Секоја година се зголемува бројот на странски државјани кои добиле дозвола за работа во Македонија. Во првите два месеци од годинава, издадени се 855 дозволи за вработување на странски државјани во Северна Македонија, покажуваат податоците на Агенцијата за вработување. Минатата година пак таа бројка изнесувала 5.893 што е незначителна во однос на вкупниот број на вработени кои на крајот на 2023 година биле 687.459. Но, дали недостигот на работници ќе го зголеми увозот на работна сила од странство.
„Мораме погледнеме прво на внатрешните резерви, во сите економии пред да се охрабриме малку по повеќе да ги отвориме вратите за увоз на странски работници“, вели Јован Деспотовски, директор на Дирекцијата за Технолошко индустриско развојни зони.
Деспотовски смета дека е потребно реструктурирање на економијата за да се најдат и внатрешните резерви.
„Постојат резерви на работна сила во делот на индустријата. Повеќе од 10 односно 12 отсто во македонското индустриско производство сè уште учествува делот на производството на облека и обувки што има релативно ниска додадена вредност, објаснува Деспотовски.
Додава дека и Македонија и регионот сè повеќе се фокусираат на инвестиции кои креираат повисока додадена вредност односно бараат работна сила којшто поседува повисоко ниво на вештини. Сепак, смета дека треба да се внимава не сами за техничките вештини со кои доаѓаат странските работници, туку да се внимава и на културолошките разлики.
„Добро е што фаќаме чекор посебно со заедничкиот пазар на работна сила со Србија и Албанија. Тоа го гледам како како шанса прво да се испеглаат разликите во платите во рамки на одредени сектори помеѓу трите земји, вели Деспотовски, и додава дека овие пазарни сили ќе помогнат реално со мобилноста на луѓето да растат платите. Деспотовски додава дека не очекува дека Отворен Балкан, ќе направи дополнителен проблем за македонскиот пазар на труд кој и онака се соочува со недостиг на работна сила.