.webp){kind=icon}
Изградбата на интерконекторот со Грција треба да почне во мај годинава, а се очекува до крајот на 2025 да биде пуштен во употреба, најавува во интервју за „Блумберг Адрија“ Бајрам Реџепи, извршен директор на акционерското друштво за пренос на гас во државна сопственост „Номагас“.
Минатата недела државата ја заокружи финансиската конструкција за реализација на проектот за изградба на интерконекторот со Грција со обезбедување 98,6 милиони евра од Европската банка за обнова и развој (ЕБОР).
Во Собранието беше усвоен и Законот за гаранција на Македонија на обврските по договорот за заем за финансирање на проектот за регионална гасификација, кој ќе се склучи меѓу АД „Номагас“ и Европската банка за обнова и развој.
Бајрам Реџепи (ТВ-гостување)
Bloomberg Adria
Реџепи вели дека во моментов во тек е евалуација на петте понуди за изведувач што стигнале на тендерот за овој проект.
„Мора да напоменеме дека целата постапка е во согласност со правилата на Европската инвестициска банка. Во моментов извештајот од евалуација е пратен во ЕИБ и чекаме одобрување од нивна страна. Минатата недела нашето Собрание го одобри и другиот дел од кредитот за да се затвори финансиската конструкција со Европската банка за обнова и развој. Нашите очекувања се дека до 24 април ќе биде одобрен од бордот на директори во ЕБОР и конечно ќе се потпише и договор со изведувач за изградба на овој многу важен интерконектор, кој е важен не само за енергетска диверзификација на Македонија туку и на регионот“, вели Реџепи.
Во однос на изградбата на секундарниот гасовод, пак, односно мрежата што ќе го донесе гасот од магистралниот гасовод до општините и до крајните потрошувачи, Реџепи вели дека до Министерството за економија стигнала само една понуда, од компанијата „Палмет енерџи аноним ширкети“ од Турција, додека од „Акса догалгас дагити А.С.“ се откажале во текот на постапката.
„Немам информација за причините зошто оваа компанија се откажа, и тоа при крајот на постапката. Остана само една понуда на јавниот повик на конкурентниот дијалог што заврши минатиот месец. Во тек е проверка дали е прифатлива или треба да се повтори целата постапка, но секако за тоа ќе одлучи Владата, кога комисијата ќе предложи дали ќе се оди со повторување на постапката или ќе се прифати таа понуда. Сепак, очекувам дека многу брзо ќе има разврска и за проектот за градење на дистрибутивната мрежа во државава“, изјави извршниот директор на „Номагас“.
