Бавно оди диверзификацијата на снабдувањето со гас

Бавно се одвиваат процедурите за диверзификација на снабдувањето со гас во Македонија за намалување на зависноста од Русија.  

Интерконекторот кон Грција на пример, за кој се разговара од 2016 година, сè уште не почнал да се гради.  Сепак, директорот на Национални енергетски ресурси, Бајрам Реџепи, во изјава за „Блумберг Адрија“ вели дека подготовките се при крај и следниот месец очекува да се распише тендер за почеток на градба.  

„Планираме до крајот на годината да се потпишат и договори и конечно да започне и градбата на интерконекторот со Грција, кој ќе има огромен капацитет од 2,8 милијарди кубни метри годишно, кои ќе бидат многу повеќе од нашите очекувања за потрошувачката во државата“, вели Реџепи.  

Тој очекува голем придонес во диверзификацијата на снабдувањето со гас и од интерконекторот со Србија.   

„Секако ги започнавме постапките за градење  нов интерконектор со Србија. Добрата вест е дека овој проект беше ставен и на листата на ЕУ и ги започнавме сите потребни постапки за да се направи студијата за оправданост годинава и конечно да се потпише договор со Србија за изградба на овој интерконектор, кој ќе биде многу важен за снабдување не само за јужниот дел на Србија туку идејата е да се поврзе и со другата мрежа на гасниот оператор на Србија. Така што, тоа ќе биде голем придонес за снабдување на целиот регион, бидејќи знаеме дека се менуваат маршрутите за снабдување со Европа. Се очекува голем дел да поминува од јужните потоци кон централниот дел на Европа и кон западниот дел и секако ние ќе ја користиме оваа шанса за добар дел од тие количества да поминуваат преку нашата држава. Верувам дека во првата половина на 2025 година овој интерконектор ќе биде конечно пуштен во употреба“, вели директорот на Националните енергетски ресурси.  

Bloomberg Adria

Во однос на европските пазари, каде што цените на гасот беа нестабилни минатата недела, поради можноста за штрајкови на работниците во Австралија, Бајрами посочува дека за нарушувањата има и други фактори. 

„Мислам дека нарушувањата што се случија минатиот период не се должат само на најавената криза во Австралија туку имаше и други фактори. Цената и берзанските движења имаат повеќе фактори што влијаат во тргувањето и мислам дека влијаеше тоа што во многу голем дел од годината имаше многу ниска цена во споредба со ланската. Знаете дека во овој период скокна дури до 360 евра по мегават-час во периодот август-септември, бидејќи многу беше ниско нивото на резервите на ЕУ и имаше драматичен скок. Тоа се должи на фјучерсите на раните резервации, особено на ликвидните берзи што се референтни во ЕУ, но секако дека тоа се стабилизира и нормално дека во текот на зимата се очекува да бидат повисоки од сегашните, иако засега не се очекува драматичен скок“, вели тој.  

За Македонија, Реџепи очекува мирна зима, без ценовни шокови.  

„Нашите очекувања се дека нема да има драматични поскапувања, особено во регионалните берзи. Ценовни шокови не се очекуваат, освен ако не се случи некоја хаварија во сегашните големи цевководи што го снабдуваат регионот. Ланската година беше многу подраматична, но ние ги направивме сите чекори за да има непречено снабдување со природен гас и да нема многу големи ценовни шокови. И успеавме во тоа. Оваа зима мислам дека нè очекува малку помирен период, бидејќи првата добра вест е дека функционалниот интерконектор меѓу Грција и Бугарија има доволен капацитет. Се најавува и пуштање во употреба на новиот ЛНГ-терминал Александропулос, кој секако ќе го подобри снабдувањето за регионот, и не се очекува да има драматични скокови и во берзите. Така што ние, секако, ги направивме и сите подготовки за непречено снабдување со гас, но многу е важно и тоа да биде со прифатливи цени за нашите потрошувачи“, вели директорот на Националните енергетски ресурси.  

Во моментов нема коментари за веста. Биди прв да коментира...

Остави коментар