Недостигот од какао ги вивна цените на производот на највисоки нивоа по близу 50 години. Неповолните временски услови и болестите се главни двигатели на цената на какаото, кое бележи поскапување од 170 проценти од почетокот на 2023 година.
Извесно е дека климатските промени ќе придонесат производот да го има сè помалку, а цените и на крајните слатки производи ќе растат.
Глобалната чоколадна криза нема да ја одмине ниту Македонија, а најголем ефект ќе се почувствува при крајот на годината, вели во интервју за „Блумберг Адрија“ Горан Ѓорѓиевски, претседател на Агробизнис-комората и извршен директор на пекарско-слаткарската фирма „Специјал“.
„Цените на какаото стигнаа до небесни височини до 10.000 долари за тон. Во последните три месеца растот е 60 отсто. Во моментов кондиторските компании што се најголем потрошувачи на какаото имаат договори склучени од минатото и сè уште реално не се чувствува тоа кај нив, бидејќи тие работат по однапред договорени цени. Меѓутоа, вистинскиот удар по производите ќе дојде на крајот на годинава, тогаш ќе мора сегашните цени на какаото да се вкалкулираат во крајната цена. Тоа најмногу ќе се почувствува околу Нова година, кога ќе дојде тој чоколаден удар на пазарот“, вели Ѓорѓиевски.
Тој посочува дека причина за ваквите состојби се лошите посеви кај клучните одгледувачи во Западна Африка.
Покрај растот на цените, Ѓорѓиевски очекува производителите да ги намалат и грамажите на самите производи.
„Јас сум сигурен дека и тоа ќе го видиме, затоа што едноставно и тоа е еден вид решение за компаниите да го амортизираат ударот... Сето ова ќе мора на крајот да биде вкалкулирано во финалната цена на благите производи“, вели тој.
На прашањето дали заврши времето на евтини слатки задоволства, Ѓорѓиевски вели дека смета дека воопшто заврши времето на евтината храна.
„Војната што се случува во наша близина се одрази и на цените на пченицата, сончогледот, сончогледовото масло, вештачките ѓубрива итн. Сите овие трошоци ќе се одразат врз крајните цени“, вели тој.
Со него зборувавме и генерално за движењето на цените на храната во Македонија и очекувањата од тазе донесениот Закон за забрана на нефер трговски практики.
Ѓорѓиевски очекува законското решение да воспостави ред на пазарот и да ја намали сивата економија, но потенцира дека крајниот ефект ќе зависи од капацитетот на институциите да го спроведат законот.