Над 55 проценти од вкупните вложувања од инвестициските фондови во Македонија во 2023 година биле пласирани во Македонија. Преостанатите средства, според статистиките за географска изложеност, се пласираат на пазари во Европа, САД и во Јужна Америка.
Но што е она што доминира на македонскиот пазар и во кои сектори или компании се гледа најголем потенцијал во 2024 година?
Според Сашо Дракуловски, главниот извршен директор на „Вега фондови“, на прво место е банкарскиот сектор.
„Кај нас, генерално, банките се најбаран или најинтересен сектор и дефинитивно, во последните 10-15 години, тој сектор бележи голем раст и профитабилност и има добри дивиденди. Банките секако се најзастапен сектор и најликвидни компании на кои се тргува на нашата берза. Тука е и фармацевтскиот сектор. Генерално, целата ликвидност се сведува на две-три компании, 70 отсто од ликвидноста на нашата берза е во овие компании од банкарскиот сектор и фармацијата“, вели Дракуловски.
Сепак, тој посочува дека во наредниот период се можни промени во перформансите на банките со оглед на очекуваниот пад на каматните стапки.
„Треба да се земе предвид дека кај нас моментално банките се на оние максимални вредности и инвеститорите треба да бидат внимателни поради тоа што ова се исклучително добри години за нашите банки, но не знаеме дали така ќе продолжат и во иднина, така што овие цени треба да се земат со одредена резерва и луѓето да бидат свесни за можноста за одредени корекции во наредните години. Банките го искористија овој период на каматни стапки и направија екстра-профити. Овој тренд можеби ќе се задржи годинава, но в година ќе има намалување и банките ќе мора повторно да се фокусираат повеќе на кредитирање и поризично работење“, вели Дракуловски.
Забележително е дека кога станува збор за компании со најголема нето-добивка по акција, само мал дел од нив се наоѓа и на листата на најликвидни хартии од вредност на Македонската берза. Тоа уште еднаш го истакнува проблемот со ликвидноста на македонскиот пазар на капитал.
Според главниот извршен директор на „Вега фондови“, за заживување на македонската берза требаат и нови инструменти.
„Слабата ликвидност е проблем за целиот регион, не само за Македонската берза. Кај нас генерално имаме и мали компании во однос на европските и светските берзи. Поради малиот број компании и малата капитализација е слаба и ликвидноста. На нашиот пазар му недостигаат и нови инструменти и нови компании што би котирале на берзата. Да има и ЕТФ-ови и слични нови хартии и инструменти за да заживее берзата. Дефинитивно ние не сме во фокусот на оние големи инвестициски фондови пред сè поради слабата ликвидност“, вели Дракуловски.