Во услови на дефицит од квалификуван кадар, губењето добар работник се чини е луксуз за компаниите што не смеат да си го дозволат. Па, сè поголема е важноста на умешноста на фирмите за добро управување со човечкиот капитал и мотивирање на вработените.
„Платата веќе не е пресуден фактор за да задржите добар работник“, вели во интервју за „Блумберг Адрија“, Дарко Петровски, претседателот на Македонската асоцијација за човечки ресурси.
„Секако дека подобрата плата ќе придонесе за нивниот подобар животен стандард и живот, меѓутоа не е само платата клучна туку генерално условите на работа. Подобрите услови на работното место се мотив за вработените да останат во одредена компанија. Пред сè тука се разбирањето и довербата што надлежните во компанијата ги имаат кон своите вработени и можноста за професионален и кариерен развој на вработените“, вели тој.
Дарко Петровски
Bloomberg Adria
Петровски потенцира дека кога станува збор за младите, пак, особено е важно да им се даде слобода во нивниот кариерен развој.
„Менаџирањето со талентите е многу важна стратегија во управувањето со човечкиот капитал, особено кога станува збор за младите луѓе, значи оние што го носат прогресот на некаков начин. За младите е важно и да им се даде предизвик во работењето на одредени проекти, за да може да се развиваат во текот на работењето, важно е и нешто што компанијата прави да има социјален импакт за вработените да чувствуваат дека даваат некаков придонес за општеството. Секако, тука се и стратегиите за платите и наградите за мотивација на вработените и обезбедувањето сигурност на работното место“, вели претседателот на Македонската асоцијација за човечки ресурси.
Bloomberg Adria
Новите технологии и развојот на вештачката интелигенција, пак, допрва ќе ги менуваат пазарот на трудот и потребните вештини од вработените.
Во таа насока Петровски смета дека освен техничките и дигитални вештини, сè повеќе ќе се бараат од работниците деловни способности како критичко и креативно размислување.
„Промените што ги носат новите технологии и вештачката интелигенција генерално ги ценам како позитивни, затоа што на некој начин тоа ќе доведе до замена на мануелните трудово интензивни процеси. Сега, се разбира, во тој процес вработените ќе треба да се стекнат со нови вештини, а некои што претходно се барале на пазарот на трудот полека ќе исчезнат. Покрај оние професионални вештини, т.н. тврди вештини, секако ќе биде потребно да се совладаат сите оние компјутерски и дигитални вештини, но јас би ставил фокус на нови, би рекол, меки деловни вештини што ќе бидат потребни, а кои досега можеби и не беа толку истакнати, како способностите за критичко и креативно размислување, способноста за наоѓање решенија на проблемите и развиената емоционална интелигенција, која мислам дека ќе биде многу значаен фактор за вработените да можат да добијат добра работа или да ја задржат онаа работа што ја имаат“, вели Петровски.
.webp){kind=icon}
