Правната сигурност е многу важен фактор за влез на странските инвеститори – посочува адвокатот Драган Лазаров управувачки партнер во адвокатска канцеларија Лазаров во интервју за „Блумберг Адрија“. Смета дека државата треба да се фокусира токму на тоа да се изгради еден здрав и функционален правосуден систем којшто ќе биде објективен, независен и непристрасен.
„Тешко е да се создаде добра бизнис клима, ако сè уште добиваме негативни оценки за македонското судството од Стејт департментот и од Европската комисија, вели Лазаров.
Лазаров посочува дека како адвокат кој генерално работи со странски инвеститори, ја има улогата и на промотор на Македонија како погодна за инвестиции, но вели дека таа улога не е лесна кога имате објективни фактори коишто укажуваат дека правосудниот систем е речиси тешко функционален.
„За било какви инвестиција никој нема да дојде со сериозен капитал ако знае дека капиталот не му е сигурен во државата во која оди“, вели Лазаров.
Тој додава дека во текот на изминатата година се донесе еден сет нови закони, со што се прави сериозен исчекор кон европското законодавство во уредување на целиот финансиски сектор.
„Станува збор пред сè за новиот закон за финансиски инструменти коишто ги дава самите основи за понатамошен напредок и развивање на пазарите на капитал“, вели Лазаров.
Сепак, додава дека се потребни многу понатамошни реформи коишто би донеле до конечно отворање кон европските па и светските пазари на деривати.