Биткоинот расте, но иднината на парите лежи на друго место

Нова форма на дигитални пари станува вирална, опфаќајќи десетици милиони корисници, милијарди трансакции и вниманието на централните банки во светот. Не, не е биткоинот, кој се искачи над 69.000 долари на 12 март за да постави нов рекорд за првпат од ноември 2021 година. Наместо тоа, зборувам за бразилскиот евтин систем за инстант плаќање „Пикс“ (Pix), кој може да има подобри шанси да ја обликува иднината на финансиите отколку криптовалутите. 

Лансиран во 2020 година, првичната идеја зад „Пикс“ - како и кај сите добри финтек-решенија - беше да се зголеми финансиската вклученост, да се олабави контролата на концентрираниот банкарски систем и да се направат плаќањата побрзи и поефикасни. Успеа со неверојатна брзина - досега го користеле 160 милиони луѓе или 80 проценти од возрасната популација на Бразил, како и 13 милиони компании. Како омилен начин на плаќање во земјата, стана конкурент на кредитните и дебитните картички. Планот е да се прошири проектот низ светот во време кога централните банки експериментираат со поправки на платниот систем и дигитални валути за да ја задржат контролата врз технолошките иновации.

Замислете го ова како друга страна од таканаречениот страв од пропуштање на работите (популарно наречен ФОМО, од англискиот израз „fear of missing out“), кој е присутен на пазарот на биткоин, криптовалута што закрепна по лансирањето на американските фондови со кои се тргува на берзата - ЕТФ. Во суштина, тоа е пакување на монетата во поатрактивен и попристапен пакет, иако самиот биткоин останува многу поподложен на складирање и на шпекулации отколку активностите како плаќање сметки или генерирање предвидливи приноси. Додека популистичките пораки околу биткоинот претставуваат изрази на пркос кон семејството, пријателите и финансиерите што предупредуваат да не се купува она што Ворен Бафет го карактеризира како „отров за глувци на квадрат“, „Пикс“, од друга страна, е бесрамно институционален - тоа е систем за фиат плаќања, кој го води централната банка. За користење ви треба банкарска сметка, а учеството на деловните банки во процесот е задолжително. Исто така, тука нема приказна за блокчејн на повидок.

„Пикс“ сепак е футуристички проект на свој начин и несомнено поздрав за економијата отколку сегашното купување испарливи дигитални монети и мим-монети како доџкоин (dogecoin) или пепе (pepe), со надеж дека на крајот ќе дојде некоја поголема будала и ќе ги откупи по повисока цена.

Студијата на Меѓународниот монетарен фонд забележува дека трансакциите на „Пикс“ се завршуваат речиси веднаш и со пониска стапка на трошоци од другите платежни системи - тие се бесплатни за поединци и чинат околу 0,33 проценти за трговците, што е пониско од надоместоците од приближно 1,13 процент за дебитните картички или 2,34 проценти за кредитните картички и значително пониско од 3,99 проценти предложени од „Ватсап“ (WhatsApp) на „Мета платформс“ (Meta PlatformsInc) за нејзиниот платен систем

Се разбира, и тука има ризици, без разлика дали станува збор за гејзирот на податоци за лични трансакции изложен на проверки од централната банка, ризикот од измама или фактот дека системот допрва треба да се тестира под голема финансиска криза. Но треба да бидете навистина заслепени од дигиталното злато за да ги игнорирате придобивките од „Пикс“. Една студија цитирана од „Банкер“ (The ​​Banker) покажа дека добивката од овој брз и удобен систем на плаќање се прелеа на малите банки и локални фирми далеку од големите градови, што доведе до поголемо кредитирање на претприемачите и домаќинствата и повеќе капитални инвестиции. Централната банка на Бразил исто така ја зголеми дигиталната писменост за да се осигура дека луѓето нема да бидат изоставени од новите трендови. Во свет во кој таксите за трансакции сè уште се околу еден процент во многу земји и влијаат на растот, приказната за „Пикс“ изгледа како добра вест.

Сето тоа нè враќа на помалку охрабрувачките вести за најновиот наплив на биткоини. И покрај сензационализмот околу ЕТФ-овите, иронијата е што тука има малку ново - тоа е истата стара шпекулација, со истите стари котирани компании како „Микростратеџи“ (MicroStrategy Inc.) подготвени да купат повеќе биткоини (иако може да има некои закани за приходите за таквите како „Коинбејс глобал“). Остануваат ризиците што го погодија криптопазарот, вклучувајќи го и влошувањето со одливот на капитал на пазарите во развој - Нигерија процени дека минатата година 26 милијарди долари криптоплаќања поминале преку локалниот ентитет на „Бајненс“ (Binance).

Да се ​​надеваме дека „Пикс“ ќе докаже, на долг рок, дека ФОМО не може да се спореди со вистинската корист - пред да се појави следниот криптомеур.