Снимки од жена која вреска за помош во зграда зафатена од пожар, споделени на социјалните мрежи, предизвикаа протести во различни делови на Кина, бидејќи граѓаните се сè поуморни и огорчени од политиката на изолација на цели станбени области како дел од строгата стратегија за „нулта ковид“ на кинеските власти.
За неколку часа, незадоволството се прошири на интернет и жители на населбите во Пекинг и другите градови беа снимени како се соочуваат со властите кои сакаа да ги затворат нивните региони.
Луѓето кои излегоа на улиците повикуваат на нови правила насочени кон релаксирање на политиката за нулта толеранција кон Ковид-19, како и намалување на штетата направена врз економијата.
На интернет се појавуваат сè повеќе видеа на кои се гледа како жители им се спротивставуваат на службениците, а тоа го зголемува борјот на демонстранти кои излегуваат на улиците, па можат да се слушнат дури и повици за оставка на претседателот Си Џинпинг, што е невидено во последните 10 години откако тој дојде на власт.
Причина за незадоволството е пожар кој изби во четвртокот вечерта во висококатница во градот Урумчи во западната провинција Синџијанг, кој од август е отсечен од светот. Најмалку 10 лица загинале во пожарот, а граѓаните го изразија гневот на интернет, прашувајќи се дали изолацијата на населбата ја одложила или ја спречила спасувачката акција.
Градските власти во петокот се извинија и изразија жалење за жртвите, но ги отфрлија тврдењата дека жителите не можат да се евакуираат поради мерките против Ковид-19.
Сепак, следниот ден, жителите на Пекинг и другите градови го наведоа токму овој инцидент при соочувањето со локалните власти кои се обидуваа да го затворат пристапот до нивните згради.
Во саботата во Шангај демонстрантите се собраа на улицата именувана по градот Урумчи за да им оддадат почит на жртвите, но и да протестираат барајќи ублажување на строгите мерки и прекин на заклучувањето во провинцијата Синџијанг.
Жителите на Ланжу во северозападна Кина беа прикажани како демонстрираат во саботата навечер, при што некои демонстранти ги рушеа блокадите поставени на патиштата за да излезат од заклучувањето. Други демолираа киосци и шатори поставени за тестирање од Ковид-19.
Bloomberg Mercury
Кинеската влада сè уште официјално не реагирала, но главниот весник на Комунистичката партија на насловната страница објави текст за неопходноста од политика на „нулта ковид“, која, како што се наведува, е во согласност со духот и принципите на партијата.
Сега постојат стравувања дека властите би можеле да употребат сила за да ги потиснат натамошните протести.
.webp){kind=icon}
