Кинеското отворање може да ѝ даде нов залет на инфлацијата

Широко е распространето верувањето дека инфлацијата низ светот ќе забави следната година, бидејќи каматните стапки растат, потрошувачката паѓа, а рецесијата станува поизвесна.

Замрзнувањето на цените на суровините, храната и енергијата ќе биде позабележително во однос на силниот раст во текот на оваа година.

Сепак, новото отворање на Кина по стратегијата за нулта ковид може да ги наруши тие очекувања.

Сценариото би можело да изгледа вака: во одреден момент следната година, Кина ги отвора своите граници за првпат од почетокот на пандемијата. Последиците за остатокот од светот би можеле да бидат големи. Таму стопанството заживува, студентите повторно патуваат во други земји, се раздвижува туризмот, а деловните луѓе им се враќаат на авионските летови. Во исто време, кинескиот пазар на недвижности почнува да закрепнува и тоа дополнително ја поттикнува потрошувачката.

Отворањето на Кина би ги зголемило глобалните цени на суровините и повторно би можело да ја компликува ситуацијата со синџирите на снабдување, што, логично, врши притисок врз многу цени и услуги.

Доколку Кина целосно се отвори до средината на следната година, аналитичарите на „Блумберг“ проценуваат дека цените на енергијата би можеле да пораснат за 20 отсто, а индексот на потрошувачките цени во САД, по падот на 3,9 отсто на средината од годината, може повторно да се зголеми на 5,7 проценти до крајот на 2023 година.

Разбудената Кина

Ваквото кинеско сценарио би било целосно спротивно од улогата што годинава ја одигра големата економија, кога всушност донекаде и помогна да се ограничат ценовните притисоци.

Падот на домашниот пазар на недвижности и политиката кон епидемијата значително ја забавија кинеската економија, за која годинава се предвидува раст од три отсто. За следната година, според сегашните околности, се очекува раст од 5,1 отсто.

Голем број параметри покажуваат дека забавувањето на кинеската економија имаше влијание врз секое ќоше на светската економија.

Според Меѓународната агенција за енергетика, кинеската набавка на нафта оваа година ќе биде на најниско ниво од 1990 година.

Кинескиот увоз од Јужна Кореја, нејзиниот петти по големина трговски партнер, падна најмногу од 2009 година, а ограничувањата во воздушниот сообраќај на вториот по големина пазар во светот, по САД, паднаа на 35 отсто од она што беа во 2019 година. Од поранешните 14.000 лета дневно, бројката падна на само 2.800 минатиот месец.

Bloomberg Mercury

Разбудената Кина би ја зголемила побарувачката за нафта и суровини.

„Нема сомнеж дека целосното отворање на Кина ќе ја зголеми глобалната инфлација“, вели Ирис Панг од банкарската групација ИНГ (ING).

Засега останува прашањето колку Кина би можела да се отвори следната година, но властите во Пекинг неделава објавија план од десет точки за олеснување на мерките против ковид-19. Во неколку града, вклучувајќи го и Пекинг, веќе има одредено олеснување на мерките, и покрај порастот на бројот на заразени.

Почеток на крајот

Вицепремиерот Сун Чунлан рече дека борбата против пандемијата влегува во нова фаза, која аналитичарите ја толкуваат како почеток на крајот на политиката на нулта толеранција.

Сепак, пред да дојде до економско закрепнување, на Кина ѝ се заканува здравствена криза. Недостигот од кревети за интензивна нега го отежнува излезот од политиката за нулта толеранција, која може да се продолжи за период подолг од следната година.

Целосното отворање може да создаде потреба за интензивна нега за 5,8 милиони луѓе, додека кинескиот здравствен систем за интензивна нега во просек има помалку од четири кревети на 100.000 жители, значително помалку отколку во развиените земји.

Поради тоа може да се очекува Кина да се обиде со внимателно и бавно отворање, што сепак може да предизвика проблеми околу мобилноста на населението, со синџирите на снабдување или довербата на потрошувачите.

Еден од првите вистински тестови за новиот пристап на Кина ќе биде на крајот на јануари, за време на кинеската Нова година.

И покрај неизвесноста, пазарите се подготвуваат за повеќе знаци на новата политика кон вирусот, при што берзанскиот индекс на Хонгконг во ноември ја забележа најголемата месечна добивка од 1998 година, па дури и Австралија има ефект на прелевање од очекувањата за промена на кинеските мерки, каде што берзата е на највисоко ниво во изминатите седум месеци.

Има уште една причина зошто Кина може да биде двигател на инфлација следната година.

Во последните недели беа најавени голем број мерки за стабилизирање на цените на недвижностите. Дури и ако тоа не биде доволно за нов силен момент во секторот, на кој според некои процени отпаѓаат 25 отсто од кинеската економија, би можело да биде доволно стапката на бруто-домашниот производ да се врати на посакуваното ниво.

Така, комбинацијата од почетокот на закрепнувањето на пазарот на недвижности и отстапувањето од политиката на нулта ковид може да има влијание врз трговските партнери и финансиските пазари на Кина.

Како што пишуваат Федералните резерви на Њујорк во еден документ: „Она што се случува во Кина не останува во Кина“.