.webp){kind=icon}
Веројатно менувањето на логото со сината птица на Твитер во Х има совршена смисла. Како познат симбол за исклучување на нешто, X буквално ги сумира достигнувањата на оваа социјална мрежа под водство на Илон Маск. Тој верува дека новото име може да помогне Твитер да се трансформира во „суперапликација“ слична на кинеската Вичет. Но ова не е првпат милијардерот да ја потцени изводливоста на своите грандиозни идеи...
Добро утро! Ова се петте вести што треба да ги знаете на почетокот на денот.
Македонците најзагрозени во регионот кога е станува збор за здравата исхрана
Иако дневниот трошок за здрава исхрана во Македонија е меѓу најниските во регионот Адрија, нашата земја е прва на листата од пет земји рангирани по тоа колкав дел од населението не може да си дозволи здрави оброци во еден ден, покажуваат податоците од истражувањето на Светската банка.
Имено, во 2021 година дури 15,5 проценти од вкупната популација во Македонија не можеле да си дозволат здрава исхрана.
Bloomberg Adria
ФЕД ќе ги зголеми каматите, за септември сите опции се отворени
Федералните резерви на САД (ФЕД) ќе ги зголемат каматните стапки на денешната седница за 25 базични поени односно на опсег од 5,25 до 5,5 проценти, очекува аналитичкиот тим на „Блумберг Адрија“.
„Сегашната дебата е всушност дали ова е конечното зголемување. Иако пазарите моментално така гледаат на тоа, целокупната слика не е многу јасна, има сигнали и за и против понатамошни рестриктивни чекори“, вели Марина Петров, сениор аналитичарка за пазари во „Блумберг Адрија“.
„Секако дека има доволно време подобро да се разгледаат трендовите до следната, септемвриска одлука, така што не очекуваме претставниците на ФЕД да дадат премногу јасни сигнали за понатамошните чекори“, додава Петров.
Германија веројатно и натаму е заглавена во рецесија, велат од „Ифо“
Претседателот на германскиот институт „Ифо“ (Ifo), Клеменс Фуест, посочи дека новиот слаб резултат, кога станува збор за деловното расположение во таа земја, укажува оти најголемата европска економија можеби сè уште е во рецесија.
„Изгледа германската економија се мачи да излезе од оваа рецесија“, изјави тој за телевизијата „Блумберг“.
„Ифо“ објави дека индексот на деловната клима во Германија паѓа трет месец по ред. Индексот месецов падна на 83,5 од 83,8 во јуни, малку повисоко отколку што предвидуваа економистите во истражувањето на „Блумберг“.
„Епл“ планира повисоки цени за новите модели „ајфон про“
Компанијата со седиште во Калифорнија планира да ги одржува испораките на стабилно ниво, и покрај нестабилната глобална економија и проектираниот пад на севкупниот пазар на паметни телефони. Многу е можно заработката на компанијата да се зголеми, со оглед на тоа што „Епл“ планира да ги зголеми цените на моделите „про“, велат упатени извори.
„'Епл' го води бранот на 'премиумизација', достигнувајќи рекорден удел на повеќе нови места што обично не се сметаат за негови основни пазари“, нагласуваат аналитичарите на „Кантерпоинт“ (Counterpoint Research). „Одличен пример е Индија, каде што во вториот квартал од 2023 година забележа раст од 50 отсто на годишно ниво“.
Падот на биткоинот може да ја намали предноста на крипто во однос на акциите
Некогаш завидната предност на пазарот на криптовалути во 2023 година во однос на акциите се распаѓа, бидејќи биткоинот се повлекува под 30.000 долари.
Растот од почетокот на годината во индексот на стоте највредни дигитални монети се олади на 46 отсто, што не е далеку од скокот од 41 отсто на индексот на технолошки акции Nasdaq 100. Еуфоријата поради производите со вештачка интелигенција (ВИ) го придвижи индексот, кој накратко го надмина МВИС (MVIS CryptoCompare Digital Assets 100 Index) во јуни.
