„Епл“ планира повисоки цени за новите модели „ајфон про“

„Епл“ (Apple Inc.) бара од доставувачите годинава да произведат околу 85 милиони телефони „ајфон 15“ (iPhone 15), што е приближно во согласност со минатата година, според извори запознаени со ситуацијата.

Компанијата со седиште во Калифорнија планира да ги одржува испораките на стабилно ниво, и покрај нестабилната глобална економија и проектираниот пад на севкупниот пазар на паметни телефони. Многу е можно заработката на компанијата да се зголеми, со оглед на тоа што „Епл“ планира да ги зголеми цените на моделите „про“, велат изворите, кои побарале да не бидат именувани бидејќи компанијата јавно сè уште не ги објавила овие цели.

Богатството на „Епл“, највредната компанија во светот, остава свој белег на глобалната економија, стимулирајќи го бизнисот за илјадници доставувачи и вработувајќи милиони луѓе од САД, преку Кина и Виетнам, до Индија. Акциите на технолошкиот гигант пораснаа за 50 отсто оваа година, со што неговата пазарна капитализација достигна три билиони долари.

„Епл“ и неговите ривали се подготвуваат за остар пад во побарувачката за електроника, од паметни телефони до компјутери, бидејќи и корпорациите и потрошувачите избегнуваат да купуваат поради зголемените цени и економската несигурност. Во САД се очекува ФЕД повторно да ги зголеми каматните стапки оваа недела за да се справи со инфлацијата, додека Кина, втората по големина економија во светот, ја загуби силата во вториот квартал.

Поради влијанието на компанијата, распоредот на производство на „Епл“ внимателно се следи. Од „Самсунг“ (Samsung Electronics Co.) до ТСМ (Taiwan Semiconductor Manufacturing Co.) и „Фокскон“ (Foxconn Technology Group), деловниот раст и маржите на некои од најголемите компании зависат од бизнисот со ајфони. Во 2018 година „Епл“ објави дека ќе престане да објавува бројки за испораките, како дел од промената на фокусот на инвеститорите кон попредвидливи елементи од бизнисот, како што е ап-стор (App Store).

Годинава компанијата ја намали прогнозата за новите телефони за околу два милиона поради проблеми во производството на сензори за слика CMOS, но падот е компензиран со дополнителни нарачки за поскапите модели „про“, велат изворите.

Bloomberg

Исто така има мал застој во производството на новите екрани за !ајфон“, но проблемите треба да се решат за недела или две и нема значително да се одразат на целокупното производство, вели еден од изворите. Проблеми со производството на екраните претходно објави и „Информејшн“ (The Information).

Претставник на „Епл“ не одговори на барањето за коментар испратено преку е-пошта. „Дигитајмс“ (DigiTimes) претходно објави дека првата пратка на новите ајфони би можела да биде помеѓу 83 и 85 милиони телефони.

Прогнозата на компанијата за испораки на 85 милиони телефони оваа година е малку пониска од првичната цел на испорака од 90 милиони, која „Епл“ ја имаше поставено за претходните две години. Сепак, американската компанија не успеа да ги постигне тие цели поради недостиг од чипови во 2021 година, а потоа и продолжените мерки против коронавирусот во Кина во 2022 година, што го наруши производството.

Релативно стабилното богатство на „Епл“ е контраст во однос на борбата на компанијата со неколку ривалски фирми што произведуваат уреди со оперативниот систем Андроид.

Продажбата на телефони падна осми квартал по ред, вклучувајќи го и падот од осум отсто во јунскиот квартал, според „Кантерпоинт“ (Counterpoint Research). Кинеските брендови на телефони со оперативен систем Андроид, „Виво“ (Vivo) и „Шаоми“ (Xiaomi), забележаа пад на продажбата за повеќе од 10 отсто.

„Кантерпоинт“ проценува дека продажбата на „Епл“ паднала за два отсто во последниот квартал, но нејзиниот удел на пазарот се зголемил на 17 отсто поради континуираниот раст на побарувачката за телефони што се продаваат за 600 долари или повеќе.

„'Епл' го води бранот на 'премиумизација', достигнувајќи рекорден удел на повеќе нови места што обично не се сметаат за негови основни пазари“, напишаа аналитичарите на „Кантерпоинт“ во извештајот. „Одличен пример е Индија, каде што во вториот квартал од 2023 година забележа раст од 50 отсто на годишно ниво“.

Во моментов нема коментари за веста. Биди прв да коментира...

Остави коментар