.webp){kind=icon}
За десет години надвор од Македонија се родиле над 48.600 македонски деца. Или толку колку што има вкупно жители во Струмица и Гевгелија заедно, според пописот од 2021 година. За шест месеци од минатата учебна година, во Прилеп, поради иселување, од училиште биле испишани 300 деца. Но, за време на самитот во Блед, некои од иселените во Словенија го сретнале премиерот Ковачевски и му рекле побрзо да ја внесе земјава во Европската Унија и тие ќе се врателе. Да, ќе се вратат исто колку што јас ќе се вратам во Прилеп. И не дека јас не сакам, децата не сакаат.
И не се селат само луѓето од Македонија туку и фабриките од Германија. Цените за енергентите во земјата се високи, што го прави производството скапо и неисплатливо. Затоа се бараат други пазари. Плус, инфлацијата во земјата не паѓа со очекуваното темпо. Во Шпанија и Франција, пак, таа забрза во август. На ниво на еврозоната остана иста како минатиот месец, а довербата во економијата се намалува како што расте стравот дека податоците за инфлацијата ќе бидат аларм за Евроопската централна банка да продолжи со затегнувањето што ќе доведе до рецесија.
И Македонија ќе треба да почека за „пристојна инфлација“, велат аналитичарите на „Блумберг Адрија“ во последната регионална анализа. Веќе се крчка нов ценовен шок од септември, иако Владата смирува дека тој би бил нереален и најавува мерки како порано, односно во игра е и замрзнување на цените. И да замрзнат цените на храната, огревот ќе нѐ изгори зимава.
Ќе „горат“ и каматите. Задолжувањето станува сè поскапо за сите, а земјава веќе идната недела, на самиот почеток на септември, ќе се задолжи со нови 58 милиони евра. Вистинскиот проблем со кусокот во буџетот ќе се види во септември, кога треба да се реализира зголемувањето на платите за јавниот сектор за 10 отсто, а Владата ќе се обиде да ги обезбеди парите преку прераспоредување средства.
Пари за својата кампања за нов претседателски мандат неделава обезбеди и поранешниот американски претседател Доналд Трамп. Со сликата од затвор собра донации од 7,1 милиони долари, што е околу една петтина од над 35-те милиони долари што ги доби во текот на вториот квартал преку Заедничкиот комитет за собирање средства „Трамп, спаси ја Америка“ (Trump Save America).
Fulton County Sheriff's Office
