Владата нa вчерашната седница го усвои предлог-буџетот за 2024 година во кој се планирани вкупни приходи од пет милијарди евра, што е за 10 проценти повеќе во однос на 2023 година. Расходите се планирани на ниво од околу 5,5 милијарди евра, што е за 5,8 проценти повеќе во однос на годинава. Извесно е дека овие проекции тешко ќе се остварат со оглед на тоа што се базирани на амбициозни очекувања за раст на економијата од 3,4 проценти. Поради тоа, веројатно е дека повторно ќе бидеме сведоци на ребаланс.
Добро утро, подолу петте вест што ги издвоивме за почеток на денот.
Тешко до милијардите од ЕУ со нивните услови и нашата „способност“
Нема да биде лесно да се дојде до милијардите од Европската Унија, заклучуваат познавачите коментирајќи го Планот за раст што неодамна го презентира Европската Унија. Наши соговорници тврдат дека земјите од Западен Балкан ќе треба да вложат решителни напори за унапредување на домашната реформска агенда и за зајакнување на економската интеграција во регионот доколку сакаат да ги отклучат овие шест милијарди евра.
Како до овој колач, што е предвидено, а што ќе се реализира. Ги анализираме основните постулати на овој план за кој претставувајќи го, од Европската комисија беа категорични дека економската конвергенција е суштински елемент за приближување на земјите од Западен Балкан до ЕУ.
ЕУ-дијагноза за Македонија: Умерено, ограничено, бавно
Македонија постигна одреден напредок и е на добро ниво на подготовка за развој на функционална пазарна економија, но зборовите „умерен“, „бавен“ и „ограничен“ доминираат при оценувањето за исполнувањето на економските критериуми во новиот извештај на Европската комисија за напредокот на нашата земја во евроинтегративниот процес.
Меѓу главните забелешки се бавниот напредок во спроведувањето пошироки мерки за подобрување на управувањето со јавните инвестиции, пречките што ги предизвикува сивата економија, бавниот напредок во рационализацијата на парафискалните давачки и нетранспарентноста при доделувањето државна помош.
ББА-анализа: Регионот Адрија има потенцијал за емисии на корпоративни обврзници
Последниве години ги обележи општ пораст на трошоците за задолжување за приватниот сектор, кое денес се одвива во помал обем и за пократок временски период. Тоа не е карактеристика само на финансирањето преку кредити туку овој тренд го зафати и светот на корпоративните обврзници.Издавањето корпоративни обврзници во регионот Адрија не е многу популарно.
Од почетокот на 2019 година, словенечките компании се задолжија преку пазарот на капитал во вкупен износ од 3,3 милијарди евра, хрватските компании за нешто повеќе од две милијарди евра, додека во истиот период во другите земји од регионот Адрија не видовме емисии на корпоративни обврзници. За споредба, во наведениот период полските компании преку пазарот на капитал се задолжиле 13 пати повеќе од словенечките, чешките десет пати повеќе од словенечките, а унгарските шест пати повеќе од словенечките компании.
Инфлацијата во САД во голема мера забавува, поволен сигнал за Фед
Инфлацијата во САД во голема мера забави во октомври, што е охрабрувачки знак за напредок за Федералните резерви (Фед) на долгиот пат кон скротување на ценовните притисоци. Таканаречениот основен индекс на потрошувачки цени, кој ги исклучува нестабилните категории како храна и енергија, се зголеми за 0,2 отсто од септември, покажаа податоците на Бирото за статистика на трудот во вторникот. Економистите го сметаат основниот мерач како подобар показател за базичната инфлација во однос на вкупниот индекс на потрошувачки цени (CPI). Таа мерка не се промени, водена од пониските цени на бензинот.
И покрај некои бранувања во последниве месеци, инфлацијата значително се намали од 40-годишниот максимум постигнат минатата година. Состојбите доведоа до тоа неколку креатори на политиката од Фед да сигнализираат дека можеби тука е крајот на зголемувањето на каматните стапки, но претседателот Џером Пауел постојано нагласуваше дека централната банка би спровела нови покачувања доколку е потребно.
Нова регулатива за виното од Македонија
Владата на денешната седница, по предлог на Министерството за земјоделство, шумарство и водостопанство го прифати новиот закон за вино. Станува збор за нова регулатива која е во целост усогласена со одредбите на европското законодавство. Министерството соопшти дека овој нов предлог закон за вино е на страна на лозарите и решава уште еден проблем, а тоа е откупната цена.
Со новиот закон за вино, за првпат, ќе се утврдува производната цена на винско грозје по килограм, најдоцна до 15 јули во тековната година и тоа за најмалку две најзастапени сорти. Пресметката на трошоците за производство на килограм винско грозје на определена површина и соодветен квалитет, согласно дадена методологија, предвидено е да ја врши високо образовна или научна институција од областа во земјоделството.
.webp){kind=icon}
