.webp){kind=icon}
„Ејџијан ерлајнс“ (Aegean Airlines) ја прекина продажбата на билети за планираната нова авиолинија меѓу Скопје и Крф, која требаше да започне на почетокот на јуни. Летовите требаше да се одвиваат двапати неделно, во вторник и во сабота.
Добро утро, подолу петте вести што ги издвоивме за почеток на денот.
Расте бројот на Македонци што „играат“ на берза, акции се даваат на подарок
Се зголемува бројот на домашни физички лица што инвестирале на македонскиот пазар на капитал, покажуваат податоците на Централниот депозитар за хартии од вредност (ЦДХВ). Имено, на крајот на минатата година се евидентирани 61.199 домашни физички лица инвеститори, што е зголемување од 1,88 процент во однос на 2022 година, кога имало 60.067 такви инвеститори.
Од друга страна, во истиот период има намалување на бројот на странски физички лица инвеститори за 3,72 проценти. ЦДХВ бележи зголемување и на странските правни лица и на домашните правни лица што се јавуваат како инвеститори на македонскиот пазар на капитал. И покрај тоа, лани имало значителен пад на бројот, вредноста и количеството на хартии од вредност за кои биле порамнети склучените трансакции на Македонската берза во однос на претходната година.
Како да се осознаете себеси преку уметност за 2.000 евра?
Уметничка работилница за хармонија, подмладување и инспирација во близината на археолошкиот локалитет Стоби им се нуди на туристите. Деталите за овој ексклузивен настан, кој треба да се одржи од 20 до 27 јули годинава, се објавени на „Бук ритритс“ (Book Retreats), еден од водечките пребарувачи на одморалишта за личен развој.
„Ослободете го умот, а потоа уживајте во забавните часови по сликарство. Истражете ги прекрасните предели на Демир Капија и античкиот град Стоби. Сите нивоа на искуства со уметност се добредојдени“, пишува на сајтот каде што е објавена и деталната програма. Пакетот од 1.999 долари вклучува сместување со појадок во хотел во селото Паликура, општина Росоман, кој е во сопственост на позната македонска винарница.
Се топат заштедите на фирмите
Вкупните кредити во април бележат раст од 6,8 проценти на годишно ниво, а вкупните депозити од 9,3 проценти, соопшти Народната банка. Зголемувањето и кај кредитите и кај депозитите се должи на зголеменото кредитирање и кај домаќинствата и кај корпоративниот сектор, но поизразен е кај домаќинствата.
На месечно ниво, вкупните депозити бележат месечен раст од 1,3 отсто. Овој раст целосно се должи на домаќинствата во услови кога депозитите на корпоративниот сектор се намалуваат. Вкупните депозити на корпоративниот сектор во април бележат намалување од 1,3 отсто, споредено на месечна основа. Надолната промена во најголем дел е резултат на падот на краткорочните депозити во странска валута и депозитните пари, а во помал дел и на краткорочните депозити во денари, во услови на раст на долгорочните депозити.
Раст на зелената енергија преку корпоративните договори за купопродажба на струја
Со зајакнувањето на ценовната конкурентност на енергијата од ветрот и сонцето, а следствено и со слабеењето на државната поддршка преку напуштање на субвенционираните шеми (како што е тарифата ФИТ), корпоративните договори за купопродажба на електрична енергија - ППА (од англиски: power purchase agreements - PPA) полека добиваат централна улога во развојот на обновливите извори на енергија. Овие договори се склучуваат директно помеѓу производителите на електрична енергија од обновливи извори и потрошувачите на таа енергија.
Нивната долгорочна природа (обично за период од околу десет години) му овозможува на производителот подобро да ги предвиди продажбите и резултатите и го олеснува финансирањето на проектите, а за корисникот (компанијата) овозможува поедноставно финансиско планирање и заштита од нестабилноста на пазарот (стабилност на трошоците преку склучување договори со фиксна цена), но, уште поважно, овозможува и позеленување на бизнисот, односно декарбонизација на бизнисот.
„Мајкрософт“: Вештачката интелигенција ќе направи револуција кај персоналните компјутери
Корпорацијата „Мајкрософт“ (Microsoft) воведе нов софтвер и компјутери исполнети со карактеристики на вештачка интелигенција - засилувајќи ги своите напори да ги надмине „Гугл“ (Google) на „Алфабет“ (Alphabet Inc.) и „Епл“ (Apple Inc.) во овој сегмент. Новата категорија на компјутери фокусирани на вештачка интелигенција ќе се вика Копилот+ПЦ (Copilot+PC), изјави главниот извршен директор Сатја Надела на настанот во понеделникот во кампусот на „Мајкрософт“ во Редмонд, Вашингтон.
Машините од линијата „Сурфејс“ (Surface) на „Мајкрософт“ и производствените партнери ќе понудат поголема моќност и ќе бидат 58 отсто побрзи од врвниот „мекбук ер М3“ (MacBook Air M3) на „Епл“, соопштија од компанијата, делумно благодарение на специјалниот чип кој е посветен на процесирање со вештачка интелигенција. Новите машини ќе стартуваат од 1.000 долари.
