„Мета“ (Meta Platforms Inc.) отстрани 63.000 сметки на Инстаграм во Нигерија поврзани со измамници што ги користеле услугите на социјалните мрежи за да уценуваат корисници откако добиле интимни фотографии, соопшти компанијата во средата.
„Мета“, која исто така ги поседува Фејсбук (Facebook) и Ватсап (WhatsApp), додаде дека избришала илјадници дополнителни профили, страници и групи на Фејсбук што споделувале упатства за тоа како да се уценува и да се врши сексуална изнуда врз корисниците.
Масовното отстранување се случило на крајот на мај - шест недели по приказната на „Блумберг бизнисвик“ за брзиот пораст на финансиската сексуална изнуда во САД. Злосторството вклучува измамници што се претставуваат како тинејџерки на Инстаграм (Instagram) или на Снепчет (Snapchat) за да ги наговорат своите цели да им испратат нивни разголени фотографии. Експлицитните фотографии потоа се користат за уцена на корисниците, при што сторителите се закануваат дека ќе ги проследат фотографиите до пријателите и семејството.
ФБИ вели дека ваквиот вид на изнуда е едно од најбрзорастечките злосторства насочени кон децата во САД. Од крајот на 2021 година повеќе од дваесет малолетници, главно тинејџери, се самоубија откако станале жртви. Насловната приказна на „Бизнисвик“ во април се фокусираше на самоубиството на Џордан Демеј, 17-годишна фудбалска и кошаркарска ѕвезда од Мичиген. Откако Демеј изврши самоубиство поради Инстаграм, локалната полиција и ФБИ ги следеа неговите уценувачи во Лагос, Нигерија, и екстрадираа двајца млади мажи во САД за да се соочат со обвиненија. Тие се изјаснија за виновни во април.
Експлозијата на финансиските сексуални изнуди во последниве години е поврзана со „Јаху бојс“ (Yahoo Boys), лабаво поврзана мрежа на дигитални измамници што масовно дизајнираат измами. „Мета“ соопшти дека многу од фејсбук-страниците и групите што ги отстранила се поврзани со членови на „Јаху бојс“, кои се обидуваат да „организираат, регрутираат и обучуваат нови измамници“.
Групите продаваат упатства за уцена и водичи за измами. Тие исто така споделуваат линкови до фотографии што може да се користат за легитимирање лажни налози. Според „Мета“, една мрежа од 20 лица водела 2.500 „лажни налози за прикривање на нивниот идентитет“, кои главно биле насочени кон мажи во САД.
„Финансиската сексуална изнуда е ужасно злосторство што може да има катастрофални последици“, посочи „Мета“ во изјавата. Нејзината истрага покажа дека повеќето обиди на измамниците не успеале. За случаите кога уценувачите биле насочени кон малолетници, „Мета“ рече дека ги пријавила во Националниот центар за исчезнати и злоупотребени деца. „Ова е простор во кој криминалците еволуираат за да го избегнат постојаното подобрување на заштитата од наша страна“, велат од компанијата. „Ние ќе продолжиме да се фокусираме на разбирањето како работат тие за да можеме да останеме чекор понапред“.
.webp){kind=icon}
