Кои се најдобри зимски пневматици за автомобили: тест на германски АДАК

Почетокот на зимата е период кога возачите ги менуваат летните пневматици на автомобилите со зимски. За таа цел германскиот автомобилски клуб АДАК (ADAC) ги испитуваше перформансите на 12 бренда на пневматици од типот 205/55 R 16, кои одговараат на пониската средна класа автомобили или таканаречената компактна класа. Со кои модели безбедно ќе ја пребродите студената сезона? Не се препорачуваат сите пневматици со оваа големина. 

„И покрај бумот на теренците, возилата од компактната класа сè уште се многу популарни. Лесно е да се разбере зошто: ’фолксваген голф’, ’опел астра’ и ’тојота корола’ сè уште се достапни и доволни за повеќето потреби. Се разбира, пневматиците треба да бидат исто толку добри како и самите возила“, наведуваат од АДАК.

Оттаму додаваат дека добрите зимски пневматици не само што мора да обезбедат високо ниво на безбедност при возење во зимски услови на патот туку мора да се покажат добро и во суви и во влажни услови.

Кои пневматици поминаа најдобро на тестот?

Моделите од производителите „Континентал“ (Continental), „Гудјиар“ (Goodyear) и „Мишелин“ (Michelin) го исполнуваат токму она што би го очекувале од модерните пневматици, велат од АДАК.

„Тие се многу добро избалансирани, не покажуваат слабости на ниту една коловозна површина и исто така може да се пофалат со долгата предвидена километража. Сите три беа оценети како ’добри’ и затоа се многу препорачливи“, наведуваат од АДАК.

Оттаму посочуваат дека еден вид пневматици доминираат како победници на тестот - „континентал винтер контакт ТС870“ (Continental WinterContact TS 870).

„Тие ги поставуваат стандардите за севкупна безбедност при возење (оценка 1,8), што главно се должи на фактот што ниту едни од конкурентните пневматици не можат да се мерат со нив во влажни и зимски услови“, велат од АДАК.

Од клубот укажуваат и дека „мишелин алпин 6“ (Michelin Alpin 6) исто така доби добри оценки за безбедност при возење и се на високо ниво, но не колку пневматиците „континентал“.

„Од друга страна, тие добија особено добри резултати во однос на влијанието врз животната средина. Имаат најголема предвидена километража (53.200 километри) и најмала абразија при тестот и исто така обезбедуваат мала потрошувачка“, посочуваат од АДАК.

Од АДАК додаваат дека „гудјиар ултрагрип перформанс 3“ (Goodyear UltraGrip Performance 3) се помеѓу двата конкуренти во однос на безбедноста при возење и влијанието врз животната средина и ја комплетираат врвната група оценети со „добро“ на тестот.

А колку се добри другите пневматици?

Четири други тестирани модели исто така се препорачуваат за купување. Со вкупна оценка 2,6 за „хенкок винтер ицепат РС3“ (Hankook Winter i*cept RS3) и „данлоп винтер спорт 5“ (Dunlop Winter Sport 5) и вкупна оценка од 2,8 за „нокиан сноупруф 2“ (Nokian Snowproof 2) и „фалкен еуровинтер ХСО2“ (Falken Eurowinter HS02), тие се во горниот опсег на „задоволува“ (од 2,6 до 3,5 на скалата за рејтинг на АДАК).

„Тие имаат свои специфични предности: ’фалкен’ се подобри на суви патишта отколку во зимски услови, ’хенкок’ подобро се справуваат со мраз и снег отколку со влажни патишта, а ’данлоп’ имаат предности на снег, но се просечни на суви површини. ’Нокиан’ нема ниту особено силни страни ниту особено слаби“, наведуваат од АДАК.

Кои пневматици се меѓу последните?

Пет модели се далеку зад седумте високо препорачани или препорачани пневматици во тестот. „Винран винтер-макс А1 ВР22“ (Winrun Winter-max A1 WR22) се на дното на листата.

„На прв поглед тоа се пристојни зимски пневматици, бидејќи тестерите на АДАК им даваат добри оценки во зимски и суви услови. Но алармантно е колку е слаб зафатот на влажни патишта: во кривините тие имаат тенденција многу рано или многу доцна да го променат правецот, што значи дека возачот навистина не може да ги предвиди реакциите на возилото“, посочуваат од АДАК.

Оттаму укажуваат дека фактот што возилото за тестирање со пневматици „винран“ сè уште се движело со нешто помалку од 30 км/ч. при сопирање на влажно на брзина од 80 км/ч., а одамна застанало на тестот со „гудјиар“ и „пирели“ кажува дека тоа може да биде многу опасно. Поради тоа, пневматиците „винран“ имаат најлоша оценка на тестот од 5.5 - незадоволителни.

„Фактот што ’пирели синтурато винтер 2’ (Pirelli Cinturato Winter 2) не добиваат препорака за купување и покрај добрите перформанси при сопирање на влажни услови и завршуваат на второто место од назад се должи на нивните лоши перформанси во суви услови. ’Вредстеин винтрак’ се многу слични: и покрај добрите перформанси на снег, тие се премногу неурамнотежени и слабо функционираат на суви патишта. „Зитекс ВХ 1000“ (Zeetex WH 1000) не импресионираа во ниту една тест-дисциплина, а тестерите на АДАК не препорачаа да се купи ниту „ГТ радиал винтерпро 2 ево“ (GT Radial WinterPro 2 Evo), наведуваат од клубот.

Кои пневматици траат најдолго?

Бидејќи економскиот аспект исто така игра улога за многумина, врз основа на мерења на АДАК е предвидена и километражата на пневматиците.

„Сепак, добар резултат од тестот (погоре) секогаш треба да биде одлучувачки фактор“, констатираат од АДАК.

Тестираната големина на пневматиците 205/55 R 16 е широко користена и одговара на широк спектар модели на автомобили. Меѓу другото, одговара на актуелните модели од пониската средна класа, позната и како компактна класа. Меѓу најпознатите модели од оваа класа се автомобилите: „алфа ромео џулиета“ (Alfa Romeo Giulietta), „ауди А3“ (Audi A3), „БМВ серија 1“ (BMW 1 Series), „форд фокус“ (Ford Focus), „дачија сендеро“ (Dacia Sandero), „мерцедес А класа“ (Меrcedes A-Class), „опел астра“ (Opel Astra), „рено меган“ (Renault Mégane), „тојота корола“ (Toyota Corolla), „шкода октавија“ (Škoda Octavia), „фолксваген голф“ (VW Golf) и многу други.