Годинава е на пат да стане најтоплата досега

Годинава ќе биде најтоплата досега и првата што ќе ја надмине целта поставена на Париската конференција за климата во 2015 година, според податоците на Европската Унија.

Температурата во 2024 година веројатно ќе биде повеќе од 1,55 Целзиусов степен над прединдустриското ниво, соопшти Службата за климатски промени „Коперник“ (Copernicus) во четвртокот. Историскиот Париски договор повикува на намалување на емисиите на јаглерод диоксид со надеж за ограничување на глобалното затоплување на 2 Целзиусови степана (3,6°F), или идеално 1,5 Целзиусов степен, над температурите од почетокот на индустриската револуција.

Целта од 2 Целзиусови степана е горната граница што научниците ја поставиле за да се спречи климатските промени да достигнат точка од која нема враќање, предизвикувајќи катастрофални поплави, суши и бури. Целта од 1,5 Целзиусов степен генерално се смета за долгорочен просек, а не за една година, и преговарачите за климата ја истакнаа можноста за враќање на температурите под прагот во случај на прекршување.

Сепак, наодите на „Коперник“ додаваат тежина на растечките грижи дека подолготрајното зголемување е само прашање на време, бидејќи глобалните емисии на CO2 сè уште не го достигнале врвот. Податоците доаѓаат во комбинација со победата на Доналд Трамп на изборите, што сега му овозможува да ги исполни предизборните ветувања кога ги нападна климатските политики нарекувајќи ги „нова зелена измама“.

Рекордно топлата година го зголемува предизвикот со кој се соочуваат делегатите што ќе присуствуваат на разговорите за климата КОП29, кои започнуваат следниот понеделник во Баку, Азербејџан.

„Ова претставува нова пресвртница во однос на глобалните температурни рекорди и треба да послужи како катализатор за зголемување на амбициите за претстојната конференција за климатските промени“, рече Саманта Бургес, заменик-директорка на „Коперник“.

Октомври беше 1,65 Целзиусов степен потопол од прединдустриските нивоа, 15-от месец од 16 во кои температурите го надминаа тој праг. Врз основа на националните климатски планови, сега се очекува температурите да го надминат тоа ниво достигнувајќи од 2,1 до 2,8 Целзиусови степена, покажуваат новите анализи на ОН.

Температурите во октомври беа над просекот за поголемиот дел од Европа. Во текот на месецот, континентот доживеа екстремни врнежи, што доведе до поплави во регионот Валенсија во Шпанија, каде што загинаа повеќе од 200 луѓе.