Оланд предлага сојуз против партијата на Ле Пен

Поранешниот француски претседател Франсоа Оланд навести дека е подготвен да формира нова коалиција што би можела да владее доколку изборите доведат до нестабилен парламент додека левичарскиот блок се приклучува на борбата за прикривање на внатрешните поделби.

Оланд рече дека повторно влегол во политичката борба во Франција за да се кандидира за место во Националното собрание со примарна цел да го спречи Националното обединување на Марин Ле Пен да ја преземе власта.

Анкетите покажуваат дека нејзината антиимиграциска, националистичка партија ќе освои најмногу места, пред левичарскиот Нов народен фронт на второто место и партијата на претседателот Емануел Макрон на третото. Но тие анкети покажуваат и дека е малку веројатно некој да има апсолутно мнозинство.

„Постои сценарио каде што нема мнозинство. Улогата на политичките личности како мене е да најдат решенија“, рече Оланд во интервју за БФМТВ (BFMTV). „Постојат неколку начини да се направи тоа, ќе видиме што е соодветно да се направи - да се најде шеф на владата што може да ја однесе земјата напред со минимална програма“.

Во таквата конфигурација Оланд рече дека секоја партија, со исклучок на Националното обединување, ќе побара некои од нивните предлози да бидат прифатени од владата.

Коментарите на поранешниот претседател додаваат уште една промена во кратката бурна изборна кампања, која веќе ги прекрои контурите на француската политика, поттикнувајќи ја загриженоста на инвеститорите дека земјата се движи кон долготрајна нестабилност и скапи економски политики.

Макрон распиша предвремени избори откако неговата партија беше поразена на изборите за Европскиот парламент пред нешто повеќе од две недели. Првиот круг на гласање е закажан в недела, а вториот и последен на 7 јули.

Појавата на левичарскиот Нов народен фронт беше централен настан во кампањата, обединувајќи ги постојано спротивставените партии од умерените социјалисти на Оланд и зелените до крајно левичарската партија на Жан-Лук Меланшон. Нивниот договор ја исцрта изборната карта на Франција така што само еден кандидат на сојузот се натпреварува во секоја област.

Но, веќе има некои незадоволства, па дури и места каде што двајца кандидати се натпреваруваат поради внатрепартиски поделби.

Што е уште поважно, постои долгогодишен анимозитет меѓу Меланшон и Оланд, кои беа ривали на претседателските избори во 2012 година. Говорејќи на телевизијата ЛЦИ (LCI), неколку моменти по емитувањето на интервјуто на Оланд, Меланшон ја отфрли идејата за некаква форма на влада на единство.

„Консензусот не е моја цел. Тоа не е дури ни идеја што е демократска“, рече тој. „Не познавам ниту еден претседател или премиер што бара консензус во Франција. Тоа не постои“.

Оланд рече дека изборите најверојатно ќе донесат повеќе социјалисти и зелени пратеници отколку од партијата на Меланшон.

„Тој може да каже што сака, но за да биде премиер има два услова: лицето да биде назначено од претседателот и да биде прифатливо за мнозинството во Националното собрание“, рече Оланд. „Тој не е признаен како личност што треба да ја води државата“.

Глувчешка дупка

Макрон веќе навести постизборна конфигурација слична на онаа што ја предложи Оланд, повикувајќи ги ривалските политички групи да владеат заедно за да го блокираат патот на екстремната десница.

„Има многу жени и мажи што ќе мора да владеат заедно, без оглед на нивните разлики, но има крајности што не смеат да се преминат“, рече Макрон минатата недела.

Исто така, говорејќи на БФМТВ, поранешен пратеник поврзан со групата на Макрон рече дека постои „глувчешка дупка“ за можноста социјалдемократите, центристите и десницата да се здружат. „Можеме да најдеме заеднички јазик затоа што треба да им дадеме надеж на умерените Французи од левата страна, од десната страна или од центарот што не се гледаат себеси под Националното обединување односно не сакаат да бидат заложници на Националното обединување“, рече Пјер-Ив Бурназел.

Се прогнозира дека партијата на Марин Ле Пен ќе победи во првиот круг со 36 отсто, според анкетата на Ипсос за намерите за гласање во четвртокот, со зголемување од 0,5 поени. Новиот народен фронт би бил втор со 29 отсто, а партијата на Макрон, Преродба и нејзините сојузници, на третото место, со 19,5 отсто.

Ипсос анкетираше 11.820 возрасни регистрирани за гласање преку интернет од 21 до 24 јуни, со маргина на грешка од 0,2 до 1,1 поен.

Во моментов нема коментари за веста. Биди прв да коментира...

Остави коментар