Кој ќе ги плати штетите по скопскиот „ураган“ - пет вести на денот

На Истокот ништо ново, освен што нафтата скокна над 95 долари, продолжувајќи го овомесечниот раст на цената дo 30 отсто, бидејќи САД и Иран ја намалија веројатноста за разговори, а нарушувањата во глобалните залихи и понатаму се зголемуваат.

Американската војска 11-ти ден по ред изведе напади врз Исламската Република во обид да ги намали способностите на земјата да го загрозува комерцијалниот поморски сообраќај во Ормускиот Теснец, според Централната команда на САД. Поморскиот пат и понатаму останува отворен, и покрај иранската агресија.

Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот: 

 

Не секоја штета се плаќа: што следува по скопското невреме?

Кога ќе помине невремето, почнува вистинската пресметка. Кој ќе ја плати отпаднатата фасада, уништениот покрив, автомобилот врз кој паднало дрво или искршените прозорци? Одговорот не е ист за сите граѓани, бидејќи главно зависи од тоа дали имале полиса за осигурување, но и од законската постапка што следува по елементарна непогода.

Фотографиите од оштетувањата можат да бидат важен доказ, но не се доволни сами по себе. Дали некој ќе добие обесштетување зависи од тоа дали штетата е навреме пријавена, дали е извршен увид и дали се исполнети условите за надомест. Што точно покрива осигурувањето по силно невреме од какво што пред два дена беше зафатено Скопје, кои штети најчесто се надоместуваат, а кои остануваат на товар на граѓаните и што треба да направат веднаш по настанувањето на штетата, за „Блумберг Адрија“ објаснува Ралица Губерова, претседателка на Групацијата за осигурување при Стопанската комора на Македонија и извршна директорка на „Евроинс осигурување“ АД Скопје.

 

Војната во Иран ги мати сметките на ЕЦБ и НБМ: Ќе се чека ли септември за ново затегнување?

Воениот конфликт меѓу Соединетите Американски Држави и Иран продолжува да ескалира, што предизвика цената на нафтата вчера повторно да ја надмине границата од 95 долари за барел. Ваквите геополитички превирања им создаваат нови главоболки на челниците на Европската централна банка кои во четврток треба да одлучат дали ќе ја зголемат клучната каматна стапка односно дали ќе има ново затегнување на монетарната политика.

Сите испитаници во анкетата на „Блумберг“ предвидуваат дека нема да има промена во трошоците за позајмување во четврток, но повеќето од нив потоа очекуваат во септември да има зголемување од четвртина процентен поен на депозитната стапка која во тој случај би изнесувала 2,5 проценти.

 

Кризата во Ормуз ја стега и модната индустрија – зошто облеката наскоро би можела да поскапе?

Можеби мислите дека ракетите што летаат над водите на Ормускиот Теснец се многу далеку од вашиот плакар полн со јакни, хеланки и патики.

Но, фактите говорат спротивно. Поголемиот дел од вашата облека е направен од нафта, во форма на полиестер, најлон, и други синтетички влакна. Иако последиците од нарушувањата на пазарот на нафта најбрзо се одразуваат врз цените на бензинот, дизелот и авионските билети, тие тивко, но сигурно се прелеваат и врз индустријата за облека. Најевтините парчиња облека, како хулахопките од еден долар од „Шејн“ (Shein) или палтата од 15 долари од „Тему“ (Temu), би можеле да ги почувствуваат најголемите последици.

 

Зошто акциите на „Спејс екс“ паѓаат по ИПО-то: Дали компанијата е преценета или ова е можност за купување?

Многу компании привлекоа огромно внимание во месеците пред нивната иницијална јавна понуда (ИПО), но ретко која успеа да привлече толку внимание од инвеститорите како „Спејс екс“ (SpaceX). Очекувањата растеа со секоја нова информација за ИПО-то, бидејќи „Старлинк“ (Starlink), „Старшип“ (Starship) и лидерската репутација на Илон Маск создадоа приказна за која пазарот беше спремен скапо да плати.

Таквиот интерес продолжи дури и по почетокот на тргувањето. Огромната побарувачка ја покачи цената на акциите далеку над онаа по која компанијата излезе на берза, а за само неколку дена „Спејс екс“ се најде меѓу највредните компании во светот. Сепак, само еден месец подоцна, акцијата изгуби голем дел од тој раст и падна под својата ИПО цена.

 

Какво економско значење имаат наградите од Светското фудбалско првенство?

Проширувањето на Светското првенство на 48 екипи се покажа како интересна спортска и културна можност за малите, егзотични фудбалски нации. Сепак, зад оваа приказна стои и сериозна економска димензија, бидејќи овогодинешното издание на најголемото фудбалско натпреварување донесе рекорден награден фонд од 655 милиони долари, најголем во историјата на натпреварувањето.

За мали земји како Курасао и Зелено'ртските Острови, самиот пласман може да биде значајна економска можност за фудбалските асоцијации. Иако е тешко целосно да се прецизира вистинското економско влијание на таквата награда врз самите фудбалски асоцијации, интересно е да се набљудува успехот на националните екипи преку традиционални економски индикатори како што е БДП.