Колку кеш имаат македонските „блу чипови“ - пет вести на денот

Малку им олесна на возачите во Македонија - од денеска плаќаат пониски цени за горивата. Регулаторната комисија за енергетика (РКЕ) донесе нова одлука со која малопродажните цени на нафтените деривати во просек се намалуваат за 5,81 отсто.

Најголемо е намалувањето кај дизелот, кој поевтинува за осум денари за литар и од 00:01 часот на 11 август се продава по 91,50 денари. Цените на двата бензина се намалуваат за по четири денари, па еуросупер БС-95 ќе чини 87 денари за литар, а еуросупер БС-98 ќе се продава по 89 денари. 

Во меѓувреме, нафтата го продолжи растот (цените на бензиските пумпи не се менуваат синхронизирано со движењата на светските берзи) бидејќи Иран и Оман останаа без договор за повторно отворање на Ормускиот Теснец, додека милитантите Хути презедоа одговорност за нападот врз саудиска рафинерија во близина на Црвеното Море.

Добро утро, ви пишува Игор Петровски од дигиталната редакција на Блумберг Адрија. Ова се петте вести за почеток на денот:

 

Колку нето-готовина имаат компаниите од МБИ10 и што значи тоа за вреднувањето?

Дали знаете колку готовина всушност имаат компаниите од МБИ10 и колку таа готовина влијае на нивното вреднување? На прв поглед, соодносот цена/заработка (P/E) може да сугерира дека акцијата е скапа или евтина, но сликата може да се промени кога ќе ја одвоиме нето-готовината што се наоѓа во билансот на состојба од вредноста на компанијата.

Ги пресметавме нето-готовината и односот цена/заработка приспособен на готовината за компаниите во МБИ10 за да видиме кои акции се всушност поевтини отколку што изгледаат на прв поглед по ова приспособување. Соодносот цена/заработка е еден од најчесто користените индикатори за вреднување, но не зема предвид колку готовина има компанијата на располагање. Затоа две компании со ист сооднос цена/заработка не се нужно вреднувани еднакво. Компанија со големо количество готовина може да биде поевтина отколку што соодносот цена/заработка на прв поглед сугерира.

 

Како да инвестирате во S&P 500, а да го намалите ризикот од ВИ-еуфоријата?

Кога инвеститорот вели дека инвестирал во S&P 500, повеќето замислуваат диверзифицирана кошничка од 500-те најголеми американски компании, каде што ниту една акција не може значително да го потресе целокупниот резултат.

Реалноста, сепак, е малку поинаква, со оглед на тоа што стандардниот S&P 500 денес е многу поконцентриран отколку што изгледа на прв поглед, и поради оваа причина сè повеќе инвеститори разгледуваат алтернативи, од кои една е S&P 500 Equal Weight. Пред да ги споредиме нивните историски приноси и волатилност, вреди да се објасни точно што претставува оваа алтернатива и зошто воопшто постои.

 

Волстрит ќе ја финансира „Енвидија“ со 500 милијарди долари за развој на ВИ

Група американски инвестициски гиганти се приближуваат кон партнерство со „Енвидија“(Nvidia Corp.) за финансирање од 500 милијарди долари за изградба на инфраструктура за вештачка интелигенција, според луѓе запознаени со ова прашање.

„Аполо Глобал Менаџмент“ (Apollo Global Management Inc.), „Блекстоун“ (Blackstone Inc.), „Блекрок“ (BlackRock Inc.), „Брукфилд асет Менаџмент“(Brookfield Asset Management), „Голдман Сакс“ (Goldman Sachs Group Inc.) и „ККР“ (KKR & Co.) се меѓу фирмите што водат разговори со „Енвидија“ за инвестицијата. 

 

Сергеј Брин од „Гугл“ вложи над 100 милиони долари во борбата против оданочувањето на милијардерите

Милијардерот Сергеј Брин досега вложил над 100 милиони долари во својата борба за спречувањето на оданочувањето на богатите во Калифорнија. Според поднесената пријава во петокот, коосновачот на „Гугл“ донирал дополнителни 20 милиони долари во организацијата „Да изградиме подобра Калифорнија“ , со што неговите вкупни придонеси во групата достигнаа 102 милиони долари.

Организацијата се фокусира главно на спречувањето на данокот за милијардери, а истовремено ги поддржува  про-бизнис политиките и мерките насочени кон достапно домување и други прашања. Најновиот придонес ја зацврстува улогата на Брин како најголем поддржувач на скапата кампања против „Предлогот 40“ (Proposition 40), предлог-закон кој би вовел еднократен данок од 5 отсто на богатството на милијардерите од Калифорнија и ќе биде ставен пред гласачите во ноември.

 

ЧетГПТ не краде податоци, компаниите сами ги доставуваат

Компаниите „губат време и пари на токени, честопати без никаква вредност, а компаниите за вештачка интелигенција ја земаат нивната интелектуална сопственост“, изјави ​Алекс Карп, извршен директор на „Палантир“, за Си-ен-би-си (CNBC).

Акциите на „Палантир“ скокнаа за 9 проценти истиот ден, иако неговата компанија продава платформи што ветуваат контрола на податоците како решение за проблемот за кој тој предупредува. Изјавата брзо стана вирална бидејќи ја допира дилемата со која мора да се соочи секоја компанија што користи ЧетГПТ (ChatGPT) или Клод (Claude): без разлика дали ги храни туќите модели со сопствените деловни тајни.