text size
Соларната енергија повеќе не е иднина, туку сегашност на македонската енергетика, но следната фаза мора да донесе повеќе ред, планирање и предвидливост, рече министерката за енергетика, рударство и минерални суровини Сања Божиновска на петтата Годишна соларна конференција, во организација на Македонската соларна асоцијација – Солар Македонија, која ги обединува компаниите, инвеститорите и експертите од секторот на обновливите извори на енергија.
„Не можеме да градиме обновливи капацитети побрзо од она што мрежата може безбедно да го прими. Со новата регулатива и годишните планови Македонија создава предвидлив амбиент за инвестиции и сигурен енергетски систем. Планираме однапред, ја подготвуваме мрежата и создаваме услови новите инвестиции навистина да бидат функционални и одржливи“, порача Божиновска.
Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот:
Кој е кој во јавните набавки во Македонија – нарачатели и добавувачи
Вредноста на јавните набавки во Македонија во 2025 година изнесувала 97,1 милијарди денари или преку 1,6 милијарди евра, покажува Извештајот за активностите на Бирото за јавни набавки (БЈН). Сумата била за 17 отсто поголема во однос на претходната година, додека бројот на склучени договори се зголемил за три отсто, на 34.320.
Вредноста на јавните набавки за 2025 година претставува 24 отсто од буџетот на државата, во споредба со 2024 кога изнесувал 23 отсто. Како процент, пак, од БДП, во 2025 година бројката била девет отсто, исто како и годината претходно.
Младите во Македонија се онлајн нонстоп, ама повеќе за забава, малку за работа
Ако поминете само неколку минути во кое било кафуле, училиштен двор или градски автобус во Скопје, сликата е речиси секогаш иста: младите се со погледот „закован“ во својот паметен телефон. Статистиката го потврдува она што го гледаме со голо око.
Најновите податоци на Државниот завод за статистика откриваат апсолутна дигитална поврзаност - 100 отсто од младите во Македонија на возраст од 15 до 24 години користат интернет, а дури 96,6 отсто од нив се онлајн неколкупати во текот на денот.
Агент на „Опен еј-ај“ хакирал веб-страница на австралиската влада
Австралискиот премиер Ентони Албанeзе изјави дека агент на компанијата „Опен еј-ај“ (OpenAI) хакирал владина веб-страница, при што на фирмата за вештачка интелигенција ѝ биле потребни три месеци за да ја извести владата за упадот.
Албанезе рече дека во средата во Њујорк разговарал со извршниот директор на „Опен еј-ај“, Сем Алтман, за да ја изрази својата „голема загриженост поради овој инцидент“, кој резултирал со упад во веб-страницата на австралискиот систем за јавно здравство, „Медикер“ (Medicare).
Приносот на американските петгодишни обврзници надмина пет отсто за првпат од 2007
Приносот на петгодишните државни обврзници на САД се искачи над пет отсто за прв пат по речиси две децении, бидејќи силните економски податоци на САД ги поттикнаа инвеститорите да се подготват за серија зголемувања на каматните стапки од страна на Федералните резерви.
Приносот на референтната обврзница се зголеми за дури 20 базични поени на 5,03 отсто во среда, достигнувајќи го највисокото ниво во денот откако аукцијата на обврзници во вредност од 70 милијарди долари со тој рок на достасување привлече изненадувачки слаб интерес.
Италија ја враќа во игра нуклеарната енергија, по 40 години забрана
Италија усвои закон што повторно ќе ѝ овозможи на земјата да произведува нуклеарна енергија, речиси четири децении откако таа првично беше забранета. Министерот за енергетика Џилберто Пикето Фратин го нарече ова „историски ден“ за Италија, откако Сенатот го поддржа предлог-законот со 81 глас „за“ и 51 „против“, што претставуваше последен чекор потребен за негово усвојување.
Гласањето во средата се одвиваше во време кога владата на премиерката Џорџа Мелони се обидува да го ублажи влијанието на наглото зголемување на цените на енергијата врз потрошувачите, пред општите избори што треба да се одржат следната година. Земјата се откажа од нуклеарната енергија на референдум по катастрофата во Чернобил и ги затвори своите последни централи во 1990 година.
.webp){kind=icon}
