Народната банка ги информира граѓаните да бидат внимателни поради зачестената појава на лажни профили, апликации и лица кои, електронски или преку телефонско јавување, се претставуваат како дел од реномирани компании коишто нудат некаков вид помош, посредување, па дури и парични награди, а притоа бараат лични податоци и уплата на средства.
Народната банка апелира до граѓаните да не откриваат лични податоци, ниту, пак, да преземаат активности на барање од непознати лица.
Добро утро! Ова се петте вести што треба да ги знаете на почетокот од денот.
Кои автомобили имаат најмногу, а кои најмалку дефекти?
Еден од пет автомобили паѓа на општиот технички преглед затоа што има значителни или опасни дефекти, покажува извештајот на германската Асоцијација за техничка инспекција - ТУВ (TUV), кој го објави германскиот автомобилски клуб АДАК (ADAC).
Извештајот на ТУВ за 2025 година открива кои модели на возила имаат особено добри или особено слаби перформанси при општата инспекција и каква е состојбата кај електричните автомобили.
Тој се базира на извршени 10,2 милиони технички прегледи на автомобили за периодот од јули 2023 до јуни 2024 година, во чии рамки се прегледани 228 модели на возила, поделени во шест старосни групи.
Во пензија на 67 години од 2026 година?
Да се зголеми старосната граница за пензионирање во Македонија и за мажите и за жените на 67 години, како и пензискиот придонес од 0,7 процентни поени на 19,5 проценти од 2026 година. Ова е дел од мислењето на Фискалниот совет на Македонија дадено кон документот Фискална стратегија 2025-2029, кој го подготви Министерството за финансии и кој сега е во собраниска процедура.
Фискалниот совет е независно тело што стана оперативно пред една година, а беше формиран со цел да ги надгледува макроекономските и фискалните политики во земјава. Членовите на Советот се економски експерти, а во мислењето за Фискалната стратегија, зголемувањето на старосната граница за пензионирање и повисокиот пензиски придонес ги правдаат со потребата да се одржи стабилноста на државниот Фонд за пензиско и инвалидско осигурување.
Цената на струјата за домаќинствата ќе се зголеми до еден процент
Цената на струјата може да се зголеми најмногу за еден отсто. Оваа проекција ја даде претседателот на Регулаторната комисија за енергетика, Марко Бислимоски откако соопшти дека домаќинствата и малите фирми ќе имаат намалени трошоци за седум отсто за пренос и дистрибуција на електрична енергија.
Бислимоски вели дека успеале да ја намалат мрежарината поради тоа што компаниите од овој сектор имале поголем профит од тоа што било дозволено од регулаторот. Во текот на следниве денови Универзалниот снабдувач до регулаторот треба да ги достави на контрола цените за домаќинствата и малите потрошувачи.
„Блекрок“ пред договор со кој би избил на врвот во приватниот кредитен сектор
„Блекрок“ (BlackRock Inc.) е на пат да склучи договор за купување на „ХПС инвестмент“ (HPS Investment Partners), аквизиција што би ја позиционирала компанијата во врвот на приватниот кредитен сектор, додека се стреми да стане значајна сила во алтернативните средства.
Според луѓе запознаени со ситуацијата, договорот би можел да биде објавен веќе неделава и да ја вреднува ХПС на 12 милијарди долари или повеќе. „Блекрок“ ќе плати за ХПС со комбинација од готовина и акции, рекоа упатените.
Извршниот директор на „Блекрок“, Лари Финк, агресивно се движи кон проширување на приватните пазари, а купувањето на ХПС би значело дека „Блекрок“ ќе ги постигнале двете најголеми аквизиции на менаџери на алтернативни средства во помалку од една година. „Блекрок“, веќе најголемиот менаџер на јавни акции и обврзници, се стреми да го преслика тоа ниво и во приватните средства, кои сè повеќе ги бараат пензиските фондови, осигурителните компании, државните фондови и богатите поединци.
Трамп се врати. И што сега?
Во потрага по одговор на прашањето што носи Трамп 2.0 во сферата на економијата и надворешната политика, Европа - а со тоа и целиот регион Адриjа - мора да погледне назад на неговиот прв мандат. Во тоа време републиканецот флертуваше со повлекување на САД од НАТО и отворено им се закануваше на некои европски сојузници. Тој не направи компромиси ниту на економски план, каде што воведе царини за европскиот челик и алуминиум.
Сепак, предизборната реторика честопати е многу различна од водењето на земјата, па според геополитичкиот експерт и поранешен дипломат Денис Манчевиќ, „прогнозите на Трамп треба да се земат со резерва и да се разгледаат пред сѐ во контекст на изборите“.
.webp){kind=icon}
