Растот на економијата забрза на крајот на минатата година. Според податоците на Државниот завод за статистика, во четвртиот квартал БДП порасна за 3,2 отсто, а годишниот раст изнесуваше 2,8 отсто. Расте и незадоволството од сметките за струја. За последните два месеци стигнале дури 15.000 приговори од граѓаните кои сметаат дека се оштетени.
Добро утро, ова се останатите пет вести што се важни на почетокот на овој ден
Ќе забрза ли падот на каматите - Еуриборот на најниско ниво од 2022 година
Шестмесечниот Еурибор е на најниско ниво од ноември 2022 година. На крајот на февруари се спушти под 2,4 отсто, а месецот го заврши со 2,355 отсто, колку што изнесува и во моментов. Оваа каматна стапка е клучна за банките затоа што по неа тие позајмуваат пари меѓу себе. Движењето на Еуриборот е показател за движењето на каматите на станбените и потрошувачките кредити.
Падот на Еуриборот се случува во пресрет на новата седница на советот на Европската централна банка (ЕЦБ) в четврток. Очекувањата на аналитичарите се дека на овој состанок ЕЦБ ќе донесе одлука за намалување на основната камата за 25 базични поени и дека стапката на депозитите ќе се спушти на 2,5 отсто, од сегашните 2,75 отсто. Тоа би било најниското ниво по февруари 2023 година.
Што добиваат американските технолошки милијардери што го поддржаа Трамп
Претседателот Доналд Трамп често беше непријателски настроен кон најголемите светски технолошки компании и нивните лидери, опишувајќи го Фејсбук (Facebook) како „непријател на народот“, а Џеф Безос како Џеф Кловн.
Но откако посегнаа во своите џебови за да оддадат почит, технолошките лидери се наредија на почесните места на инаугурацијата на Трамп на 20 јануари. Иако е убаво да се биде поканет на забавата, тоа не им беше крајната цел – има многу нешта што технолошките лидери ги сакаат од Трамп во следните четири години.
Путин ќе му помогне на Трамп во нуклеарните преговори со Иран
Русија се согласи да ѝ помогне на администрацијата на претседателот Доналд Трамп во комуникацијата со Иран за повеќе прашања, вклучувајќи ги и нуклеарната програма на Исламската Република и нејзината поддршка за регионалните антиамерикански посредници, тврдат извори запознаени со ситуацијата.
Трамп му го пренесе интересот за ова прашање и директно на претседателот Владимир Путин во телефонскиот разговор што се случи во февруари, а највисоките функционери од неговата администрација разговараа на истата тема со нивните руски колеги на средба во Саудиска Арабија неколку дена подоцна, тврдат извори од Москва што се запознаени со ова прашање, а кои одбија да бидат идентификувани поради чувствителноста на прашањето.
ЕУ предлага план за одбрана од 150 милијарди евра
Европската Унија ќе предложи продолжување на заемите од 150 милијарди евра за зголемување на трошоците за одбрана додека блокот се обидува да се приспособи на ненадејното повлекување на американската безбедност за континентот од страна на претседателот на САД, Доналд Трамп.
По децении на недоволни инвестиции, претседателката на Европската комисија, Урсула фон дер Лајен, изјави дека ЕУ исто така планира да активира механизам што ќе им овозможи на земјите да ги користат своите национални буџети за да потрошат дополнителни 650 милијарди евра за одбрана во текот на четири години без да предизвикаат буџетски пенали.
Европа во црвено: Берзите на континентот тонат
Побеснетиот американски претседател со низата различни наредби, од тарифите за Мексико, Канада и Кина до јастребскиот став кон европските сојузници на САД ги скрати крилјата на европските берзи. Тие танцуваат во црвено на денешното тргување, од Лисабон на запад до Варшава на исток.
„Вестите за тарифите ги притискаат акциите и ги намалуваат приносите на обврзниците, додека очекувањата за повисоки трошоци за одбраната работат во друга насока. Засега, се чини дека доминира тарифната страна на равенката. Европските акции се вратија на најниските нивоа во денот, додека приносите на обврзниците остануваат пониски“, коментира Дејвид Гудман од „Блумберг“ за денешните движења на акциите.
.webp){kind=icon}
