Судбината на Украина на маса - пет вести на денот

Во текот на оваа недела, секој ден, студентите при универзитетот „Св. Кирил и Методиј“ ќе организираат собири низ кампусите на УКИМ, за оддавање почит и изразување поддршка за жртвите од трагичниот пожар во Кочани.

Денеска собир ќе се одржи на кампусот на техничките факултети, в среда на ПМФ, во четврток пред Педагошкиот факултет, а за петок ќе биде организиран марш низ Скопје, па студентите и сите заинтересирани граѓани ќе се упатат кон Кочани.

Во продолжение, ова се пет вести за почеток на денот.

Путин и Трамп ќе разговараат за Украина

Кремљ потврди дека рускиот претседател Владимир Путин денеска треба да разговара со претседателот Доналд Трамп.

„Таквиот разговор се подготвува за вторник“, изјави вчера портпаролот на Путин, Дмитриј Песков. Тој одби да коментира за планираните дискусии.

Во неделата, Трамп на новинарите им рече дека има „многу добра шанса“ за договор. „Одиме прилично добро со Русија“, рече тој. „Ќе видиме дали имаме што да објавиме можеби до вторник“.

Одземена лиценцата за работа на „СН Осигурителен брокер“ од Битола

Агенцијата за супервизија на осигурување донесе решение за одземање на дозволата за вршење на осигурително брокерски работи на Осигурителното брокерско друштво СН Осигурителен брокер од Битола. Одлуката била донесена на седницата на Агенцијата во петокот.

По извршените теренски супервизорски контроли од страна на стручните служби на АСО, констатирано било континуирано непостапување на субјектот по изречените супервизорски мерки.

Каматните стапки на Фед веројатно ќе останат непроменети

Денеска ќе започне дводневниот состанок на американските Федерални резерви (Фед), на кој ќе се утврдат нови референтни каматни стапки. Одлуката на американските банкари е заматена од неизвесноста поради царинската војна што претседателот Доналд Трамп ја води против најголемите американски трговски партнери, но и против конкурентите. Се очекува централната банка да ги задржи каматните стапки непроменети, а одлуката за монетарната политика ќе ја објави в среда.

Економистите ги зголемија своите прогнози за инфлација по изборот на американскиот претседател Трамп поради загриженоста дека неговата трговска политика би можела повторно да ги вжешти ценовните притисоци во економијата. Според тоа, растат и очекувањата дека Фед ќе ги задржи стапките на сегашното ниво.

Политичарот Илон го уништува бизнисменот Маск

Илон Маск, „министерот за кратење трошоци“ во администрацијата на Доналд Трамп и најбогат човек во светот (сѐ уште), деновиве веројатно и самиот не знае што да направи за да престане „кратењето“ на вредноста на неговата компанија „Тесла“ (Tesla Inc.), чии акции на берзата имаат стрмоглав пад во 2025 година.

Вистинското фијаско се случува откако Маск и официјално застана на чело на Одделот за владина ефикасност (англ. Department of Government Efficiency - DOGE) по инаугурацијата на Трамп за нов претседател на САД, на 20 јануари 2025 година.

Оттогаш акциите на „Тесла“ паднаа за 46 проценти, додека, пак, од нивниот историски максимум на 17 декември 2024 година, од 480 долари, акциите загубија цели 52 процента или пазарна капитализација од речиси 800 милијарди долари. 

Зошто инвеститорите во вештачка интелигенција треба да бидат загрижени

Со години, технолошката и автоиндустријата, негуваа фантастична визија за иднината во која флотите роботаксија неизбежно ќе ги заменат стандардните возила. 

Тие предвидувања се покажаа како неоправдано оптимистични, а се засноваа на сомнителни податоци и импровизирани технички решенија.

Неуспехот за видлив прогрес на ова поле не е само поучна лекција за другите фирми што се обидуваат да продаваат роботакси, особено за компанијата „Тесла“ (Tesla Inc.) на Илон Маск и матичната компанија на „Гугл“ (Google), „Алфабет“ (Alphabet Inc). Овој неуспех покажа и дека лесно дадените ветувања на операторите на ВИ-четботови (и компаниите што се потпираат на четботови за да ги оправдаат своите изразито високо проценети вредности) треба да се земат со сомнеж, ако не и со скепса. На крајот на краиштата,  автономното возење требаше да биде полесниот дел од процесот на примена на вештачка интелигенција.