Игри без граници на златото – пет вести на денот

Златото продолжи со силен раст и првпат се искачи над 3.500 за унца, бидејќи загриженоста дека претседателот Доналд Трамп може да го разреши претседателот на Федералните резерви, Џером Пауел, предизвика бегство од американските акции и обврзници и од доларот. Златото вчера доби до 2,2 отсто, по скок од 2,9 отсто во претходната сесија.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.

Кои се најголемите „газди“ меѓу акционерите во друштвата од МБИ10?

Најголемите акционери во домашните блучипови заедно „тежат“ две милијарди евра. Минатата, 2024 година на Македонската берза беше дефинитивно во знакот на „Македонијатурист“, компанијата со чии акции се одвиваше вистинска драма, односно борба за превласт помеѓу старото раководство, големите акционери на чело со долгогодишниот директор Доне Таневски и новите „играчи“ што сакаа да се позиционираат во најголемата домашна хотелиерска фирма.

Таневски и неговата десна рака во компанијата Соња Бибановска со години беа најголемите акционери, кои заедно поседуваа околу 30 проценти од акциите, а преку други покрупни акционери, главно високи менаџери во друштвото, го контролираа мнозинскиот пакет во фирмата што поседува повеќе хотели во Скопје и околината. 

Зошто друштвата добиваат јавни опомени од Македонската берза?

Периодов како да зачестуваат јавните опомени за акционерските друштва на сајтот на Македонската берза, но оттаму велат дека во ова време од годинава тоа и не е толку чудно – на први март е истечен рокот во кој компаниите треба да ги објават неревидираните финансиски извештаи за претходната година, па на оние што не го сториле тоа, берзата им изрекува ваква мерка.

Така, на пример, најнова ваква јавна опомена на 11 април му е изречена на друштвото „РЖ Интер – Трансшпед АД Скопје“, котирано на официјалниот пазар, на потсегментот берзанска котација, поради необјавување на билансите на состојба и на успех, извештајот за паричните текови и извештајот за промените во капиталот, за 2024 година, најдоцна до 1.3.2025 година, со што, како што се наведува во соопштението, издавачот не постапил во согласност со членот 40, став 3, од Правилата за котација на Македонската берза.

Царините на Трамп го убиваат апетитот за инвестирање

Царините на американскиот претседател Доналд Трамп може да предизвикаат рецесија која ќе ги направи компаниите неволни да инвестираат во најголемата економија во светот, според директорот на една од најголемите јапонски компании за пијалаци. „Сегашната ситуација со царините ја убива желбата на другите земји да почнуваат бизнис со САД. Ова навистина го убива апетитот на светот,“ изјави Такеши Ниинами, претседател и извршен директор на „Сантори Холдингс“ (Suntory Holdings Ltd.), во интервју за „Блумберг ТВ“ во вторникот.

„Ситуацијата е навистина загрижувачка“, додаде тој. Коментарите на Ниинами доаѓаат во време кога јапонската влада преговара со администрацијата на Трамп околу нејзината заострена царинска кампања, додека земји од целиот свет внимателно гледаат како ќе помине Јапонија. Земјата се обидува да избегне сеопфатна царина од 24 отсто, како и да добие ослободување од дополнителните давачки што веќе се во сила.

Трговците рамнодушни сред „најтивкиот“ пад на пазарите

Додека S&P 500 повторно падна, вредноста на доларот се намали, а златото се искачи на нов рекорд, Волстрит изгледаше обземен од чувство на здодевност. „Ова е најтивкиот, најмирниот ден со пад од четири проценти на кој можам да се сетам“, рече Дејв Луц, 30-годишен ветеран познат по својот коментар за пазарите. „Обемот на акциите и и опциите не постои“.

За разлика од почетокот на месецот - да речеме 3 и 4 април, кога S&P 500 падна за преку 10 проценти откако претседателот Доналд Трамп ги претстави огромните тарифи или една недела подоцна кога скокна за 9,5 проценти откако тој привремено ги паузираше - атмосферата меѓу инвестициските професионалци и менаџерите со пари изгледаше прилично спокојно. Предизвикот да се гледа низ непроѕирен прозорец создаде многу погодувања.

Паѓаа и глави: Само четири роботи го преживеаја првиот полумаратон

Неколку од најдобрите хуманоидни роботи во Кина се соочија со предизвикот да се натпреваруваат против човечки маратонци на трка што се одржа во саботата. Исходот беше интересен - еден падна на стартната линија, на друг му падна главата и се стркала на земјата, а еден се урна и се распадна на парчиња.

Во она што беше најавено како прв полумаратон за андроиди во светот, само четири од 21 роботски тркач ја завршија трката за четири часа, колку што беше предвидено како конечно траење. Трката се одржа во технолошкиот центар И-таун во јужниот дел на Пекинг. Победник беше Тиангонг Ултра, висок околу 177 сантиметри, кој стигна до финишот за два часа и 40 минути.