Попусто приватни без државни инвестиции во енергетиката – пет вести на денот

Новото глобално истражување на „Прајсвотехаускуперс“ (PricewaterhouseCoopers – PwC), покажува дека во следната деценија вештачката интелигенција има потенцијал да ја зголеми глобалната економска активност до 15 процентни поени. Според најдоброто сценарио ова би ги зголемило годишните стапки на раст за дополнителен процентен поен, ниво на забрзување последен пат забележано за време на индустријализацијата во 19 век. Вештачката интелигенција ги притиска компаниите во 17 од 22 глобални сектори да ги трансформираат бизнисите во степен што не е забележан во изминативе 25 години.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.

Јалов ќе ни биде инвестицискиот бум во соларни централи без „паметни“ мрежи

Увозот на струја во 2024 година се зголемил. За разлика од 2023 година кога благодарение на елдорадото во сончеви централи во земјава беа увезени само 2,75 отсто од потребните количини струја, лани увозот изнесувал 11,03 отсто. Сепак, овој увоз е далеку помал од вообичаениот – околу 30 отсто. Лани се намалило и производството на струја, покажува годишниот извештај на Регулаторната комисија за енергетика (РКЕ) за 2024 година.

Во домашните централи биле произведени за 6,47 проценти помалку струја споредено со 2023 година, но бројките и натаму се повисоки од претходните години. „Намалувањето на производството на електрична енергија во 2024 година се должи на намаленото производство на термоцентралите, неработењето на ТЕЦ Неготино, како и на намаленото производство на хидроелектричните централи“, наведува РКЕ во извештајот.

Европските акции подобро се држат од американските во 2025

Европските акции продолжуваат со растот деновиве со оглед на зголемениот оптимизам околу тоа дека најлошото сценарио за последиците од царинската политика на Доналд Трамп може да биде избегнато. Дополнителен оптимизам влеваат и добри вести за растот на зделките на спојувања и преземања (mergers and acquisitions – M&A) на континентот.

Во моментот на затворање на овој текст, 12 часот петок, 02.05., паневропскиот индекс Stoxx 600 ја имаше додадено околу еден процент на својата вредност во дневното тргување, британскиот FTSE 100 беше пораснат за 0.8 проценти, германскиот DAX на половина од трговскиот ден веќе имаше 1,55 проценти пораст, a францускиот CAC 40 1.4 проценти.

ЕУ подготвува забрана за увоз на руски гас до крајот на 2027 година

Европската Унија се подготвува да предложи мерки за забрана на увозот на руски гас до крајот на 2027 година, додека блокот се залага за прекин на врските со земјата што некогаш беше нејзин најголем снабдувач со енергија. И покрај напорите за намалување на купувањата по инвазијата на Москва во Украина, увозот на евтин руски гас се покажува како тешко да се елиминира во време кога блокот од 27 земји се бори да ги намали цените на енергијата.

Најголемата главоболка за Европа е скокот на испораките на руски течен природен гас, кои достигнаа рекорд откако „Газпром“ значително ги ограничи испораките преку цевководи. Увозот од Русија се намали на околу 19 проценти од вкупните купувања на гас на ЕУ минатата година од повеќе од 40 проценти пред војната. За да продолжи со планот за намалување на таа зависност, ЕУ планира во јуни да предложи забрана за целиот увоз на гас според новите договори со Русија и постојните спот договори.

Цената на нафтата тоне поради зголемувањето на понудата од ОПЕК+

Цената на нафтата се намали поради загриженоста околу глобалните вишоци откако ОПЕК+ (Организација на земји извознички на нафта и нивни сојузници) се согласи на уште едно зголемување на производството, зголемувајќи ја со тоа понудата во време кога побарувачката е загрозена од притисокот од трговската војна.

На почетокот на овонеделното тргување брент (Brent) нафтата падна за дури 4,6 проценти, доближувајќи се до нивото од 58 долари за барел, додека ВТИ нафтата (WTI – West Texas Intermediate) се тргува за околу 56 долари за барел. Членките на ОПЕК и нивните сојузници ја донесоа одлуката во саботата, при што лидерите на групата се обидоа да ги казнат членовите што произведуваат премногу, вклучувајќи го и Казахстан.

Шпанија продолжува со планот за намалување на работната недела на 37,5 часа

Шпанската Влада продолжува со реализација на планот за намалување на работната недела. Кабинетот ќе го разгледа проектот утре, изјави денеска премиерот Педро Санчез во говор за време на бизнис настан во Барселона. Проектите најчесто се одобруваат од кабинетот, а потоа се испраќаат до Парламентот.

Предлог-законот ќе се соочи со долг процес на одобрување во Парламентот, каде што е далеку од сигурно дека ќе има доволна поддршка од пратениците. Санчез се потпира на мешавина од сојузници, меѓу кои се неколку левоориентирани партии, кои се отворени за пократка работна недела, но и две про-бизнис групи. Еден од поранешните сојузници на Санчез во парламентот, про-каталонската сепаратистичка група Хунтс, постојано сигнализираше дека не е за намалување на бројот на работни часови неделно од сегашните 40 на 37,5.