Како се билда просечната плата - пет вести на денот

Европската централна банка ги задржа трошоците за позајмување непроменети втор пат по ред, сметајќи дека инфлаторниот притисок е ограничен, а економијата е солидна и покрај построгите американски царини. Депозитната стапка беше оставена на два проценти во четврток - како што предвидоа сите аналитичари во анкетата на „Блумберг“. Креаторите на политиките не понудија насоки за идните чекори, продолжувајќи да нагласуваат дека ќе дејствуваат состанок по состанок врз основа на дојдовните податоци.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.

 

Просечната плата урива рекорди – реалност или балон

Во мај годинава просечната плата во Македонија достигна рекорд. Државниот завод за статистика пресмета дека во тој месец просекот на нето-платата во земјава изнесувал 45.796 денари. Но податоците за навистина исплатените плати покажуваат сосема поинаква реалност. Ниту еден работник во истиот месец не зел просечна плата. Од вкупно 509.960 вработени за кои се поднесени пресметки и исплатени плати, дури 374.045 работници или 73,3 отсто добиле плата под просечната за мај. Над тој рекорд биле 135.915 работници или 26,7 отсто.

Просечната плата е уште посомнителна ако се земе предвид дека, според податоците на Управата за јавни приходи што минатата недела ги објави „Блумберг Адрија“, во јули највисоката исплатена нето-плата изнесувала над 320.000 евра. А трите највисоки плати заедно надминуваат 700.000 евра.

 

Кој може да има пресуден збор за понудата за преземање на „Стопанска банка Битола“?

„Комерцијална банка“ во име на српската „Алта банка“ вчера ја објави понудата за преземање на „Стопанска банка“ АД Битола според која се нуди преземање на сите 371.528 акции oсвен 19.439 акции што се веќе во сопственост на српската банка и поврзаните лица. „Алта банка“ се обврзува да ги преземе сите акции по цена од 3.777 денари за акција и за таа цел веќе уплатила 1,4 милијарда денари (22,8 милиони евра) на сметка во Централниот депозитар за хартии од вредност, како што налага регулативата.

Понудата за преземање е веќе активна, а ќе трае до 10 октомври годинава и ќе се смета за успешна доколку бидат преземени 273.295 акции, кои  претставуваат 70,03 проценти од вкупниот број акции. Притоа, преземачот и лицата што дејствуваат заедно со него би поседувале 75 проценти плус една акција од вкупниот број издадени акции од „Стопанска банка“ АД Битола.

 

Откриваме тајни врски помеѓу угледен британски дипломат и осомничениот педофил Епстајн

Во јуни 2008 година, еден ден пред Џефри Епстајн да почне да ја издржува казната во затворот на Флорида за изнуда на секс од малолетно лице, тој добил порака од пријател, кој бил шокиран од неправдата на целата ситуација. „За тебе мислам сè најдобро и се чувствувам лут и безнадежен поради сè што се случи“, напишал Питер Манделсон во имејл до кој имаше увид редакцијата на „Блумберг Њуз“. „Сè уште не ми е целосно јасно. Ова едноставно не би можело да се случи во Британија.“

Во тоа време, Манделсон бил европски комесар за трговија. Денес тој е британски амбасадор во Вашингтон, што е најпрестижната позиција во британската дипломатија и само последната во низата истакнати улоги што Манделсон ги извршувал во британската влада и политика. Сега се најде во центарот на бура поради својата поврзаност со озлогласениот злоставувач, откако оваа недела беше објавена роденденска книга од 2003 година, во која Манделсон напишал десет страници пофалби за Епстајн, својот „најдобар пријател“.

 

Над 55.000 туристи од Турција ја посетиле Македонија во јули

Од вкупно 121.486 странски туристи коишто во јули ја посетиле Македонија дури 55.129 биле од Турција, покажуваат податоците на Државниот завод за статистика. На листата најмногубројни туристи во овој месец потоа следуваат Србија, Полска, Холандија и Романија. Од ДЗС информираат дека од вкупниот број туристи во јули 2025 година, 42,1 проценти се домашни, а 57,9 проценти се странски. Бројот на ноќевањата во јули 2025 година изнесува 770.733, од кои 69,2 проценти се од домашните туристи, а 30,8 проценти од странските туристи.

Во периодот јануари – јули 2025 година, во однос на истиот период од претходната година, вкупниот број на туристите е зголемен за 10,2 проценти, односно кај домашните туристи има намалување за 0,1 процент, а кај странските има зголемување за 15,1 проценти. Во периодот јануари – јули 2025 година, во однос на истиот период од претходната година, вкупниот број на ноќевањата е зголемен за 5,5 проценти така што кај домашните туристи има намалување за 0,5 проценти, а кај странските има зголемување за 11,5 проценти.

 

„Алибаба“, со зделка од речиси 3,2 милијарди долари, лидер во технолошката експанзија

„Алибаба груп холдинг“ (Alibaba Group Holding Ltd.) ја предводи најновата трка за капитал меѓу кинеските технолошки гиганти, поттикната од огромната потреба за пари во услови на жестока конкуренција во вештачката интелигенција. Компанијата планира да собере 3,17 милијарди долари преку издавање обврзници што не носат камата, а во иднина може да се претворат во нејзини американски депозитарни акции. Станува збор за најголемата зделка од ваков тип годинава, според документите до кои дојде „Блумберг њуз“ (Bloomberg News).

Инвеститорите покажале толкав интерес што понудата е целосно распродадена, велат извори упатени во процесот. „Алибаба“ засега не ја коментира понудата. Силниот апетит за капитал кај кинеските технолошки компании е доказ за острата битка во секторот, каде што милијарди се вложуваат во услуги во облак, ВИ и дури и во достава на храна.