Економската доверба во еврозоната месецов падна на најниско ниво од 2020 година, бидејќи рекордната инфлација и изгледите за прва зима без руски гас надвиснаа како сенка врз регионот.
Потрошувачкото расположение падна на 93,7 во септември. Ова е помалку од прогнозата во истражувањето на Bloomberg и најниско од ноември 2020 година. Имено, ова е седми последователен месечен пад.
Влошување покажуваат сите индикатори кои влегуваат во индексот - од услуги до индустрија. Неизвесноста кај домаќинствата е на врвот.
Исходот од истражувањето го илустрира влијанието врз расположението по исклучувањето на протокот на руски гас преку гасоводот „Северен тек 1“, како и растечката економска штета предизвикана од последиците од полугодишната војна што беснее над границата на регионот.
Истражувањето покажа и пораст на очекувањата кај потрошувачите за инфлација, иако тој показател останува значително понизок од својот врв на почетокот на годинава.
Креаторите на политиките се загрижени дека очекуваните зголемувања на цените би можеле да излезат од контрола. Во средата, претседателката на Европската централна банка (ЕЦБ), Кристин Лагард, на настан во Берлин кажа колку внимателно властите ги следат мерките како оваа.
„Гледаме што ни кажуваат нашите сценарија, правиме анализа на чувствителноста, следиме анкети, се обидуваме да разбереме што точно е во главите на инвеститорите, во главите на потрошувачите“, рече таа. „Мораме да се погрижиме тие очекувања за инфлација да останат закотвени на два отсто“, додаде Лагард.
Со зголемувањето на потрошувачките цени на работ на двоцифрен број, најновите податоци за инфлацијата ќе бидат објавени в петок, а ЕЦБ имаше две агресивни зголемувања на каматните стапки и најави дека ќе продолжат да се зголемуваат.
Инвеститорите во моментов проценуваат дека има 75 отсто шанси за второ зголемување од 75 базични поени на следниот состанок на 27 октомври.
Некои креатори на политики отворено повикуваат на такво големо покачување, потег што вкупниот број од јули би го довел на комбиниран збир од два процентни поени.
Иако економската доверба во еврозоната се влошува, таа сепак е повисока од најниското ниво во април 2020 година, веднаш по пандемијата.
Депресивното расположение во регионот најверојатно ќе продолжи со наближувањето на студеното време. Токму неделава OECD соопшти дека „Европа посебно ја сноси цената за војната во Украина и дека многу економии се соочуваат со тешка зима“.
„Доаѓаат полоши времиња“, соопшти во средата Словачката централна банка.
.webp){kind=icon}
