Инфлацијата во Обединетото Кралство во ноември падна од највисокото ниво во последните 41 година, зголемувајќи ја веројатноста дека најголемото поскапување на трошоците на живот помина.
„Потрошувачките цени пораснаа за 10,7 проценти во однос на истиот месец од претходната година“, објави денеска Агенцијата за национална статистика. Тоа претставува пад во однос на 11,1 отсто, колку што изнесуваше инфлацијата во октомври. Економистите очекуваа стапка од 10,9 проценти.
Падот во најголем дел е последица на цените на горивата и половните автомобили. Цените на храната и безалкохолните пијалаци пораснаа за 16,4 проценти, најмногу од септември 1977 година, а во таа категорија најмногу поскапеа лебот и житата.
Цените на горивата останаа непроменети меѓу октомври и ноември, а во споредба со истите месеци од 2021 година бележат раст од 7,2 проценти. Ефектот беше намалување на годишната стапка на инфлација во последните месеци.
Движење на цената на гасот во Обединетото Кралство / Bloomberg Mercury
Забавувањето ќе го поздрават домаќинствата што очајнички бараат помош по порастот на сметките за енергија и храна. Меѓутоа, тоа малку ќе помогне во поместување на разговорите за каматните стапки во британската централна банка, каде што банкарите очекуваат дека инфлацијата ќе остане над посакуваните два процента до длабоко во 2024 година и покрај тоа што економијата паѓа во рецесија.
„Иако овие бројки упатуваат на тоа дека инфлацијата го достигна врвот, таа сепак останува на неизвесно високо ниво што има реално влијание врз луѓето и компаниите. Бидејќи инфлациските притисоци изгледаат пошироко, темпото на попуштање веројатно ќе биде бавно“, рече Сурен Тиру, директор за економија на Институтот за овластено сметководство во Англија и Велс.
Базичната инфлација, која ги вклучува цените на енергијата, храната, алкохолот и тутунот, се намали на 6,3 проценти раст од 6,5 отсто, колку што беше во октомври.
Цените на алкохолот во рестораните, кафулињата и пабовите нагло пораснаа, особено вискито, вината и џинот.
„Цената на тутунот и облеката пораснаа, но повторно помалку отколку што гледавме досега. Тоа е делумно неутрализирано со цените во рестораните, кафулињата и пабовите, кои оваа година пораснаа во споредба со падот од пред една година“, рече Грант Фицнер, главен економист на ОНС (ONS).
Се очекува дека креаторите на политиките утре ќе го објават деветтото покачување на каматните стапки за задолжување во период од само една година, со цел да се запре спиралата на раст на плати и цени. Најавено е и натамошно зголемување на каматите во текот на првата половина следната година.
„Знам дека семејствата и компаниите се борат овде, во Обединетото Кралство. Намалувањето на инфлацијата и растот на платите на луѓето се мојот главен приоритет за наредниот период“, рече министерот за финансии Џереми Хант.
Има сè повеќе докази дека инфлацијата го достигна врвот и во САД, што буди надеж дека Федералните резерви (ФЕД) ќе можат наскоро да го прекинат својот циклус на покачување на каматите. Потрошувачките цени во САД пораснаа за 7,1 отсто во ноември, а паѓаа во секој од последните пет месеци.
За разлика од тоа, инфлацијата во Обединетото Кралство расте побргу отколку што се очекува во поголемиот дел од последната година и пол, поттикнувајќи барања на работниците за повисоки плати. Некои од синдикатите планираат штрајкови од сега до крајот на годинава, вршејќи притисок на владата на премиерот Рупи Сунак да ги ублажи ограничувањата на платите.
За разлика од САД, каде што цените на бензините паднаа, а пазарот на електрична енергија главно се изолира од прекуморските трендови, цените на енергијата во Обединетото Кралство оваа година сè повеќе растат откако Русија ги намали испораките на природен гас во Европа.
.webp){kind=icon}