.webp){kind=icon}
Холандија предводи во повиците до Европската Унија (ЕУ) да се насочи кон нула емисии од тешките возила за да го усогласи секторот на загадувачи со своите цели за климатска неутралност.
Европската комисија треба да постави цел за намалување на емисиите за 100 проценти од новите камиони и автобуси, според документот што „Блумберг“ го доби на увид, а кој освен од Холандија е поддржан и од Белгија, Данска и Луксембург. „Кога комисијата следниот месец ќе ги изнесе регулативите за зелен товарен транспорт, би требало да вклучи и зајакната цел за 2030 година“, велат тие.
„Сегашните цели за намалување на СO2 се применуваат само за мал дел од товарните возила на патиштата, оставајќи речиси 35 отсто од емисиите надвор од опсегот. Амбициозна ревизија е повеќе од потребна“, се вели во документот.
Предложената ревизија доаѓа по значајниот договор за ефективна забрана на моторите со внатрешно согорување за автомобилите од 2035 година. Но декарбонизирањето на тешките возила е поголем предизвик, бидејќи нивната тежина го отежнува нивното електрифицирање, додека водородните технологии сè уште се во рана фаза.
Секторот е одговорен за околу една четвртина од емисиите на јаглерод од патниот транспорт во ЕУ, каде што нивоата на загадување постојано се зголемуваат во текот на изминатата деценија. Просечниот животен век на новите камиони од 15 години имплицира дека целта за 100 проценти елиминирање на емисиите би требало да биде воспоставена до 2035 година, според еден официјален претставник запознаен со ова прашање.
Во моментов, производителите на камиони мора да се погрижат за намалување на емисиите од целиот возен парк за 15 проценти до 2025 година и за 30 отсто до 2030 година. Земјите тврдат дека регулативите за наплата и полнење горива, за кои во моментов се преговара, ќе бидат можност да се поттикне декарбонизацијата кај товарните возила.
„Товарниот патен транспорт е одговорен за повеќе од една третина од емисиите на јаглерод. Ова е можност да се дејствува. Знаеме дека е неопходно, ја имаме технологијата и гледам дека транспортните компании сакаат да напредуваат во оваа насока“, рече Вивиен Хејнен, холандска министерка за животна средина.
