Деловната перспектива на Германија дополнително се разубави, бидејќи сè поверојатно е дека рецесијата, од која многумина се плашеа откако Русија ја нападна Украина, ќе се избегне.
Показателот за очекувањата на институтот ИФО (Ifo) се зголеми на 86,4 во јануари од 83,2, колку што изнесуваше претходниот месец. Тоа е четврто последователно подобрување и поголем пораст отколку што очекуваа економистите.
Bloomberg Mercury
„Германската економија ја започнува новата година со поголема самодоверба“, рече денеска претседателот на ИФО, Клеменс Фуест.
Истражувањето е најнов доказ што сигнализира подобра краткорочна перспектива за најголемата економија во еврозоната. Цените на природниот гас паднаа од рекордните нивоа во услови на умерено зимско време и добро исполнети складишта со резерви, зголемувајќи ја надежта дека најжешката инфлација во последните децении може да се намали побрзо од предвиденото.
Владата во Берлин сега предвидува раст на бруто-домашниот производ од 0,2 проценти за оваа година, наместо намалувањето од 0,4 отсто предвидено во октомври, информираат луѓе запознаени со проекциите што ќе бидат претставени во текот на денов.
Германската централна банка, Бундесбанк, рече дека производството повеќе или помалку стагнира наместо да се намалува во последните три месеци од 2022 година. Податоците за четвртиот квартал ќе бидат објавени на 31 јануари.
Анкетата на „СП глобал“ (S&P Global), спроведена меѓу менаџерите за набавки, покажа дека услужниот сектор се вратил на експанзија во јануари за првпат од јуни лани, додека инфлацискиот притисок се намалил. Меѓутоа, производството сепак продолжи да трпи пад на побарувачката.
.webp){kind=icon}