.webp){kind=icon}
Малку е веројатно дека водечките европски банки ќе се соочат со надолната спирала што во текот на викендот ја принуди „Кредит Суис“ (Credit Suisse Group AG) да влезе во прегратките на поголемиот швајцарски конкурент УБС (UBS Group AG), сметаат аналитичарите на „Мудис“ (Moody’s Investors Service).
„Ниту една од 11-те преостанати мегабанки во регионот, вклучувајќи ги и 'Дојче банк' (Deutsche Bank AG) и 'БНП Парибас' (BNP Paribas SA), не покажува слабости на кредитниот профил што доведоа до губење на довербата на инвеститорите и депонентите во 'Кредит Суис'“, објави Мудис во својот денешен извештај.
Европските банкарски акции и обврзници беа на ролеркостер во последниве недели поради проблемите на „Кредит Суис“ и неуспехот на неколку средни банки во САД, што ја зголеми нестабилноста предизвикана од наглото зголемувањето на каматните стапки. Банкарите и регулаторите се обидоа да ги убедат инвеститорите дека европските банки не се споредливи со тие компании откако ги реконструираа нивните бизниси и го подобрија управувањето со ризикот.
„Тие банки што започнаа длабоки и скапи вежби за реструктурирање во голема мера го завршија процесот“, напишаа аналитичарите на „Мудис“, вклучувајќи го и Мајкл Рор од Франкфурт, во извештајот што се фокусираше на 12 банки што се доволно големи за да се сметаат за важни за глобалниот финансиски систем.
„Депозитите во европските банки веројатно ќе бидат постабилни отколку во САД“, смета „Мудис“. Големите заемодавци исто така имаат корист од фокусот на осигурените депозити на граѓаните и помалите удели на готовина, кои се „чувствителни на довербата“ од големи компании, корпорации или богати поединци, соопшти компанијата за рејтинг.
„Ова ќе им помогне на банките многу подобро да ги заштитат своите основи за финансирање во време на стрес и кревки пазари на капитал, поддржувајќи ја на тој начин стабилноста на ликвидните биланси на тие банки“, велат од „Мудис“.
