Виско од ЕЦБ: Инфлацијата ќе падне побрзо одошто мислиме

Членот на Извршниот одбор на Европската централна банка (ЕЦБ), Игнацио Виско, вели дека инфлацијата може да се намали побрзо отколку што оваа монетарна институција предвиде минатиот месец, бидејќи падот на трошоците за енергија продолжува да влијае на другите цени.

Иако базичната инфлација останува „тврдоглава“, пониските цени на суровините, вклучувајќи го и природниот гас, се очекува да имаат зголемено влијание, изјави Виско за „Блумберг“ во вторникот.

„Бидејќи исто така забележуваме значително намалување на цените на енергијата, мора да очекуваме дека тоа ќе се види и во базичната инфлација во наредните месеци, секако до крајот на годината“, рече Виско во Гандинагар, Индија, каде што присуствуваше на состанок на Групата 20.

„ЕЦБ предвидува дека до крајот на 2025 година инфлацијата ќе биде два отсто - мојот впечаток е дека тоа може да се случи уште побрзо“, рече централниот банкар на Италија.

Официјалните лица планираат да ги зголемат каматните стапки уште за 25 базични поени на состанокот следната недела. Нејасно е дали тоа ќе го означи крајот на нивното монетарно затегнување или на следниот состанок во септември ќе продолжи најагресивната кампања за монетарно затегнување во историјата на ЕЦБ.

Каматни стапки на ЕЦБ / Сивиот правоаголник ја претставува средната вредност на проекциите од анкетата на „Блумберг“ завршена на 13 јули Bloomberg

Според истражувањето на „Блумберг“, објавено оваа недела, економистите го очекуваат токму тоа, што би значело дека стапката на депозитите ќе порасне од сегашните 3,5 на четири проценти. Додека функционерите што го поддржуваат затегнувањето велат дека циклусот на покачување треба да се продолжи до есен, други се загрижени за влијанието на мерките врз економскиот раст откако еврозоната влезе во рецесија во текот на зимата.

„Постои ризик да се направи премногу и мислам дека треба да бидеме внимателни околу тоа“, рече Виско. „Исто така, постои ризик да направиме премалку, па мора да најдеме баланс и да носиме одлуки врз основа на добиените информации“, додаде тој.

Претседателот на Бундесбанк, Јоаким Нагел, во понеделникот за „Блумберг“ изјави дека очекува уште едно зголемување овој месец и дека секој потег во септември ќе зависи од статистичките податоци.

Централните банкари се особено загрижени за базичната инфлација, која е поотпорна од вкупната ставка. Минатиот месец достигна 5,4 проценти, иако ЕЦБ прогнозираше дека ќе забави до 2,2 процента во четвртиот квартал од 2025 година. Според истата проекција, вкупната стапка ќе се забави на 2,1 отсто до крајот на 2025 година.

Виско, кој треба да се повлече во текот на оваа година, рече дека е уверен оти ЕЦБ може да ја исполни својата задача без да предизвика економски пад.

„Не мислам дека рецесијата е неопходност“, рече Виско. „Можеме да ја намалиме инфлацијата без рецесија. Мораме да внимаваме на тоа“.

Во моментов нема коментари за веста. Биди прв да коментира...

Остави коментар