Претседателот на германскиот институт „Ифо“ (Ifo), Клеменс Фуест, во вторникот посочи дека новиот слаб резултат, кога станува збор за деловното расположение во таа земја, укажува оти најголемата европска економија можеби сè уште е во рецесија.
„Изгледа германската економија се мачи да излезе од оваа рецесија“, изјави тој за телевизијата „Блумберг“.
„Ифо“ во вторникот објави дека индексот на деловната клима во Германија паѓа трет месец по ред. Индексот месецов падна на 83,5 од 83,8 во јуни, малку повисоко отколку што предвидуваа економистите во истражувањето на „Блумберг“.
Последиците од војната во Украина се чувствуваат во германската економија, а во последно време потфрли и преработувачката индустрија. Оцената на Фуест е во спротивност со ставот на некои економисти што веруваат дека растот повторно почна, иако бавно.
Германското деловно расположение повторно опаѓа
Bloomberg
Индексот на менаџери за набавка, објавен од „Ес енд пи глобал“ (S&P Global), во понеделникот покажа дека активноста во приватниот сектор се намали овој месец.
Првите податоци за бруто-домашниот производ во вториот квартал ќе бидат познати на 31 јули. Во меѓувреме, Европската централна банка (ЕЦБ) неделава најверојатно ќе ги зголеми каматните стапки уште за 25 базични поени, што не е погодно за економски раст.
Фуест смета дека ЕЦБ би направила подобро доколку се одмори од заострувањето на монетарната политика.
„Би било паметно да се паузира и да се види кои се податоците пред да се донесат нови одлуки. Мислам дека е многу веројатно дека ќе го направат тоа“, вели Фуест.
.webp){kind=icon}
