Еврозоната ќе западне во рецесија без оглед на тоа дали руските енергетски испораки ќе престанат, според компанијата за финансиски услуги ING, од каде сметаат дека таа перспектива ќе го намали зголемувањето на каматните стапки на Европската централна банка (ЕЦБ).
„Долгоочекуваното економско закрепнување на еврозоната е откажано. Ниту еден од сегашните фактори на ризик за економијата на еврозоната веројатно нема да исчезне наскоро“, напиша во четвртокот економистот Карстен Брзески.
ING ја намали прогнозата за раст на еврозоната за 2022 година на 2,6 отсто и предвидува рецесија на крајот на годината. Брзески додаде дека ова е всушност без да се земе предвид целосно запирање на руската нафта и гас. За потсетување, најважниот гасовод што испорачува руски гас во Германија, „Северен тек 1“, од денеска нема да работи поради ремонт, како што претходно најави операторот, што ја зголемува вознемиреноста во Германија дека тоа може да значи целосно запирање на испораката.
Инвеститорите сè повеќе се загрижени дека ризиците околу енергијата би можеле да го втурнат регионот во пад. Силен економски шок ќе ѝ отежне на ЕЦБ да ја заостри политиката и веројатно ќе ја прошири разликата во стапката со САД. Ваквата загриженост го турна еврото надолу кон паритет со доларот.
За Брзески, влошената перспектива би можела да ги мотивира креаторите на политиките да ги пренасочат однапред планираните зголемувања.
Тој очекува дека официјалните лица ќе можат да ги зголемат стапките за само 100 базични поени пред крајот на годината.
„Претстојната рецесија, не само во еврозоната, туку и во САД, заедно со сомнежите за одржливоста на долгот во еврозоната, треба да ја спречи ЕЦБ да оди над првично предвидената нормализација, паузирајќи го зголемувањето на стапките во 2023 година“, рече тој.
.webp){kind=icon}
