Шнабел: Податоците покажуваат дека ЕЦБ не треба да ги намалува стапките прерано

Најновите економски показатели и поагресивните пазари, кои очекуваат централните банки да почнат брзо да ги намалуваат каматните стапки, ни кажуваат дека Европската централна банка (ЕЦБ) треба да биде трпелива во спуштањето на цените за задолжување, смета членката на Извршниот одбор на ЕЦБ, Изабел Шнабел.

Таа се осврна на инфлацијата во услужниот сектор и отпорниот пазар на труд, олабавувањето на условите за финансирање и тензиите во Црвено Море и рече дека „тоа бара претпазливост кога се зборува за непосредна промена во монетарната политика“.

„Тоа значи дека треба да бидеме трпеливи и претпазливи бидејќи од искуство знаеме дека инфлацијата може повторно да се разгори“, изјави Шнабел за „Фајненшл тајмс“ (Financial Times).

Претставниците на ЕЦБ се во режим на чекање за да видат дали новите податоци за цените и заработката ќе им овозможат да ги намалат стапките. Пазарите се обложуваат дека таквата одлука ќе дојде веќе во април, иако коментарите на официјалните лица велат дека тоа е поверојатно да се случи во јуни.

„Неодамнешните податоци го покажуваат она што веќе го мислев, а тоа е дека последниот дел од патот може да биде најтежок. Гледаме дека инфлацијата во услужниот сектор е постојана. Гледаме отпорен пазар на труд. Во исто време, гледаме значително олеснување на условите за финансирање бидејќи пазарите веќе сметаат дека намалувањето на каматните стапки ќе се случи побрзо. Згора на сето тоа, настаните околу Црвено Море предизвикуваат страв од нови прекини во синџирите на снабдување“, додаде таа.

„Мислам дека сега влегуваме во критична фаза, во која приспособувањето и преносот на монетарната политика ќе бидат особено важни бидејќи ќе треба да избегнеме враќање на инфлацијата“, рече Шнабел.

Таа посочи дека „крајната точка на пренос“ на монетарната политика веројатно е зад нас и рече дека инфлацијата во еврозоната е релативно стабилна откако се забрза на 2,9 отсто.

„Гледаме забавување и дезинфлациски процес што е карактеристичен за последниот дел од патот кон стабилна инфлација“, нагласи Шнабел. „Тоа ќе биде поврзано со заработката, продуктивноста и профитот“, заклучува таа.

Во моментов нема коментари за веста. Биди прв да коментира...

Остави коментар