Инфлацијата во Франција падна под три проценти за првпат во две и пол години, потврдувајќи го трендот што може да ја убеди Европската централна банка (ЕЦБ) да започне со намалување на каматните стапки.
Потрошувачките цени во втората по големина економија во еврозоната во март пораснале за 2,4 отсто во однос на претходната година, покажуваат податоците на агенцијата „Инсе“. Во февруари инфлацијата беше 3,2 отсто, а за март економистите анкетирани од „Блумберг“ очекуваа инфлација од 2,8 отсто.
Се очекува дека инфлацијата во Италија ќе изнесува 1,5 отсто, а податоците за движењето на цените во еврозоната ќе покажат дека инфлацијата е забавена од 3,1 на три отсто.
Како што инфлацијата се приближува до целта од два процента, повеќето функционери на ЕЦБ ги поддржуваат плановите на претседателката Кристин Лагард да започне со намалување на каматните стапки во јуни. Економистите и пазарите ги делат овие очекувања, така што намалувањето за 25 базични поени на 6 јуни веќе е речиси целосно одговорено.
Bloomberg
Гувернерот на Банката на Франција, Франсоа Вилерој де Галхау, рече дека исто така е можно ЕЦБ да ги намали каматните стапки на следниот состанок на 11 април, предупредувајќи дека предолгото чекање може да биде штетно.
„Инфлациските ризици сега се симетрични, но ризиците за економскиот раст се асиметрични до надолните страни“, рече Вилерој во четвртокот. „Дојде време да се осигураме од овој втор ризик така што ќе почнеме да ги намалуваме каматните стапки“, додаде тој.
Сепак, некои централни банкари остануваат претпазливи за зголемувањето на платите што би можело да продолжи да ги притиска цените, особено во услужниот сектор, каде што трудот сочинува голем дел од трошоците.
Францускиот извештај за инфлацијата покажа дека инфлацијата во услужниот сектор забави на три отсто во март од 3,2 отсто во февруари. Производствениот сектор забележа пад на стапката на инфлација од 0,4 на 0,1 отсто.
За француската влада, неодамнешната дезинфлација е меч со две сечила. Побавниот раст на цените ги намалува даночните приходи, придонесувајќи за проширување на буџетскиот дефицит, но официјалните лица исто така сметаат на ублажување на ценовните притисоци за економијата да може побрзо да се извлече од стагнацијата.
Посебен извештај покажува дека потрошувачката паднала за 0,6 отсто во февруари, иако економистите очекуваа раст од 0,2 отсто.
.webp){kind=icon}
Во моментов нема коментари за веста. Биди прв да коментира...