Побарувачката за „Мерцедес“ ја надминува понудата

„Мерцедес Бенц АГ“ (Mercedes-Benz AG) ја зголеми својата перспектива за годината, очекувајќи дека повеќе нови модели ќе го одржат во трка за да биде во чекор со побарувачката до крајот на годината.

Производителот на автомобили укажа на „солидните“ нарачки и „здравата и висококвалитетна“ побарувачка за возила како водечкиот електричен EQS при известувањето дека очекува подобра заработка од предвидувањата за вториот квартал од годинава. Новата SUV верзија на моделот ќе се приклучи на линијата подоцна оваа година и ќе помогне да се привлечат повеќе купувачи.

„Гледаме здрава побарувачка на сите главни пазари“, рече главниот извршен директор Ола Калениус во разговор со аналитичарите.

Најголемиот светски производител на луксузни автомобили сега очекува групниот профит да биде малку поголем од минатата година, наместо непроменет, додека приносите од производството на автомобили се гледаат меѓу 12 и 14 проценти, малку повисоки од претходно.

Акциите пораснаа за дури 4,5 проценти на почетокот на тргувањето во Франкфурт.

И покрај „розевите најави“, „Мерцедес“ до неодамна заедно со другите големи авто-производители ја делеше загриженоста за високата инфлација, проблемите со синџирот на снабдување и влошена криза со снабдувањето со енергија во Европа.

Производителите на автомобили продолжуваат да се борат со недостатокот на чипови што доведе до широко распространето стопирање на производството. Повеќето производители гледаат знаци на олеснување, иако сè уште не се сигурни дека ќе набават доволно високотехнолошки компоненти.

Во „Мерцедес“, испораките паднаа за 7 проценти во текот на вториот квартал поради недостаток на чипови, како и други логистички предизвици.

Празните салони кај дилерите им дозволија на производителите на автомобили да ги укинат типичните тешки попусти, а цените за користените возила исто така се зголемија. „Мерцедес“, како и другите производители на автомобили, имаа приоритет на производството на нивните најпрофитабилни модели, стратегија која исто така е во согласност со промената на компанијата кон повеќе автомобили од високата класа за да биде во чекор со конкурентскиот лидер кај автомобилите на електрична енергија „Тесла“ (Tesla Inc).

„Мерцедес“, исто така, презеде дополнителни чекори за да ги продолжи своите операции поради заканата од рационализирање на гасот во Германија, по одлуката на Русија да го намали снабдувањето преку клучниот гасовод во Балтичкото Море, што ги зголеми стравувањата од нагло прекинување на испораките во текот на зимата.

Фабриката во Синделфинген, каде што компанијата ги произведува висококвалитетните електрични EQS, S-Class и Maybach, сега може да функционира без природен гас, гориво што обично се користи во операциите на бојадисување на автомобилите.

Во моментов нема коментари за веста. Биди прв да коментира...

Остави коментар