Нагел од ЕЦБ: Каматите не треба да се намалат под неутралното ниво

Европската централна банка (ЕЦБ) може постепено да ги намали трошоците за задолжување на ниво што веќе не ја ограничува економската активност, но не треба да се оди премногу далеку, смета членот на Управниот совет, Јоаким Нагел.

„Со оглед на тоа што растот на потрошувачките цени во еврозоната во голема мера забавува, како што впрочем и се проектира, каматните стапки би требало бавно и со одмерено темпо да се приближуваат кон неутралната територија“, рече тој синоќа во Луксембург, додавајќи дека нема потреба да се дејствува премногу брзо.

Говорејќи на настанот во организација на Европскиот механизам за стабилност, шефот на германската централна банка „Бундесбанк“ (Bundesbank) исто така рече дека засега не гледа значителен ризик од пад на инфлацијата што би оправдал експанзивност на европскиот систем во блиска иднина.

Општо земено, на последниот состанок за годинава, кој ќе се одржи следната недела, се очекува ЕЦБ да ја намали стапката за четвртина процентен поен, при што некои инвеститори се обложуваат дури и на поголем потег во услови кога инфлацијата е блиску до целта од два отсто, а економијата се бори да расте.

Нагел истакна дека е тешко да се утврди неутралната територија, која ниту ја стимулира, ниту ја ограничува економијата.

„Оваа несигурност, според мене,е уште еден аргумент во корист на преземање внимателен и постепен пристап“, рече тој.

Неговите коментари се во иста насока со забелешките на членката на извршниот одбор Изабел Шнабел, која минатата недела за „Блумберг“ изјави дека ЕЦБ не смее да навлезе во територијата на експанзивни стапки бидејќи тоа може да има негативен ефект.

Сепак, има и членови што сметаат дека ЕЦБ не треба да ја исклучи таквата опција, како на пример Франсоа Вилерој де Галхау од Франција и Фабио Панета од Италија.

Говорејќи на истиот настан, шефот на луксембуршката централна банка Гастон Рајнеш рече дека е разумно да се очекува уште едно намалување за 25 базични поени следната недела.

Тој исто така рече дека зауздувањето на инфлацијата е на добар пат и дека целта од два отсто веројатно ќе биде одржливо достигната следната година. „Доколку се одржи таа основна линија, понатамошните постепени намалувања во 2025 година се чинат сосема соодветни“, рече тој.

Летонецот Мартинс Казакс исто така гледа уште едно намалување на стапките следната недела, велејќи во посебно интервју дека според неговото мислење стапките и натаму треба да продолжат да се намалуваат.

Во текот на вчерашниот ден претседателката на ЕЦБ, Кристин Лагард, рече дека трошоците за позајмување најверојатно ќе бидат дополнително намалени, без да даде некакви насоки за времето и опсегот.

Што вели „Блумберг економикс“ (Bloomberg Economics)?

„Членовите на управниот одбор исцртуваат борбени линии за тоа што ќе следува во 2025 година. Иако не очекуваме Лагард многу да ги коментира чекорите за следната година, општиот тон на нејзината конференција за медиумите веројатно ќе биде благ, со оглед на тоа што изгледите за инфлацијата и растот на БДП се малку помрачни од последниот состанок на ЕЦБ“, смета Дејвид Пауел, виш економист.

Нагел рече дека во моментов не би имал забелешки ако продолжи намалувањето на каматните стапки на состанокот што ќе се одржи на 11 и 12 декември, но додаде дека сè уште чека дополнителни информации.

„Ја задржувам мојата конечна процена додека не ги разгледам новите макроекономски проекции за декември и не донесам одлука за ризиците што ја опкружуваат основната линија“, рече тој.

Осврнувајќи се на германската економија, Нагел рече дека вкупните економски перформанси во последно време останаа слаби, со лоши изгледи.

„Во моментов ниту една од главните компоненти на побарувачката не нуди причина да се очекува значително закрепнување на германската економија на краток рок“, рече тој.

 

Во моментов нема коментари за веста. Биди прв да коментира...

Остави коментар