ЕЦБ ја намали клучната стапка за 25 базични поени, на 2,75 отсто

Европската централна банка (ЕЦБ) ја намали својата референтна каматна стапка за четвртина поен, на 2,75 проценти, како одговор на слабиот економски раст во еврозоната.

Намалувањето дојде неколку часа откако „Евростат“ објави дека економијата на еврозоната не пораснала воопшто во четвртиот квартал од 2024 година.

Овој потег, кој беше очекуван, ја донесе депозитната стапка на ЕЦБ на најниско ниво од почетокот на 2023 година и дојде еден ден откако Федералните резерви на САД (Фед) ги задржаа каматните стапки непроменети, и покрај повиците на претседателот Доналд Трамп за значително намалување на трошоците за задолжување.

Еврото остана речиси непроменето по одлуката на ЕЦБ, намалувајќи се за 0,1 процент во однос на доларот, достигнувајќи 1,041 долар.

ЕЦБ сега ги намали каматните стапки пет пати од минатото лето, а пазарите веднаш по одлуката предвидуваат уште две или три намалувања од четвртина поен до крајот на годината.

Централната банка предвидува само мало забрзување на растот, од 0,7 проценти минатата година на 1,1 процент годинава.

За разлика од слабиот раст на еврозоната, економијата на САД порасна со годишна стапка од 2,8 проценти во третиот квартал од минатата година.

Очекувањата на инвеститорите дека ЕЦБ годинава ќе ги намали каматните стапки повеќе од Фед го ослабеа еврото, кое се приближи до паритет со доларот.

Со промена на дотогашниот вокабулар, во декември ЕЦБ се откажа од обврската да ги држи стапките доволно рестриктивни колку што е потребно за да ја намали инфлацијата на целта од два процента.

Инфлацијата падна од врвот од 10,6 проценти во 2022 година на 2,4 проценти во декември.

Во моментов нема коментари за веста. Биди прв да коментира...

Остави коментар