Оли Рен: Еврото е слабо, време е за акција на ЕЦБ

Европската централна банка (ЕЦБ) мора да дејствува решително со цел да ја спречи рекордната инфлација и да го држи под контрола идниот раст на цените, имајќи предвид дека слабото евро дополнително ги зголемува трошоците за енергија, смета членот на Управниот совет, Оли Рен.

Важно е креаторите на политиките да продолжат со доследна нормализација на монетарната политика, изјави гувернерот на финската централна банка за телевизијата Bloomberg на годишниот состанок на гувернерите на Федералните резерви во Џексон Хол. Потребата ЕЦБ да понуди решителен одговор на следниот состанок ја потврдуваат и членката на Извршниот одбор на ЕЦБ, Изабел Шнабел и францускиот гувернер, Франсоа Вилерој де Галхау.

„Реалноста е дека имаме исклучително висока инфлација, на глобално ниво и во Европа, така што време е за акција“, рече Рен. „Следниот потег ќе биде значаен исчекор во септември, во зависност од тоа какви ќе бидат показателите за инфлацијата и прогнозите“, нагласи тој.

Потрошувачките цени во еврозоната растат со годишна стапка од околу десет отсто, а новите податоци се очекуваат в среда, па некои почнаа да размислуваат какви би биле придобивките доколку се следи примерот на Федералните резерви во САД и трошоците за задолжување се зголемат за 0,75 процентни поени. Други се повнимателни, гледајќи го тоа како опасност од предизвикување на рецесија.

Инвеститорите на пазарот на пари сметаат дека има 50 отсто шанси ЕЦБ да ја зголеми каматната стапка за половина поен во септември.

„Дилемата за монетарната политика е како да се запре инфлацијата и да не се турка економијата во рецесија“, вели Рен. „Имаме сериозна енергетска криза во Европа“ и „веројатно економијата на еврозоната ја очекува забавување. Се забавува додека зборуваме“, додаде тој.

Слабото евро придонесува за инфлаторни притисоци во еврозоната

Регионот треба да се подготви и за справување со Русија бидејќи намаленото снабдување со гас и повисоките цени на фосилните горива се феномени кои ќе останат долго време, посочи Рен. „Ова значи сериозен пад на куповната моќ на нашите граѓани“, објасни тој.

Падот на вредноста на еврото го зголемува овој проблем. Тоа е единствената валута која загуби 12 отсто од вредноста во однос на доларот од почетокот на годината и во моментот се тргува под паритет.

„Секако дека го следиме девизниот курс“, кажа Рен, нагласувајќи дека тоа е индикатор кој силно влијае на насоката на монетарната политика.

Тој исто така истакна дека е рано јавно да се зборува за квантитативно затегнување во европски контекст, иако ФЕД и Банката на Англија веќе го започнаа процесот што овозможува раст на приносите на долгорочните обврзници.

Во моментов нема коментари за веста. Биди прв да коментира...

Остави коментар