Европските комерцијални летови се враќаат на предпандемиските бројки

Податоците на европската статистичка агенција, Еуростат, покажуваат дека бројот на комерцијални летови во Европската Унија (ЕУ) расте и се доближува до предпандемиските бројки.

Во август, бројот на комерцијални летови во рамки на ЕУ пораснал за 25 отсто во споредба со истиот месец лани. Иако ова се' уште е под нивото на комерцијален транспорт од пред пандемијата, сепак разликата значајно се намалува и сега бројот на патнички летови во ЕУ во август годинава е за околу 14 проценти помал отколку во август 2019 година.

 

 

Во апсолутни бројки, минатиот месец се реализирале 596.930 комерцијални летови, во август 2021 имало околу 120.000 летови помалку, а во август 2020 година бројката била скоро половина од сегашната. Статистиката покажува дека пред пандемијата, во август 2019 година, во ЕУ реализирани биле 695.912 летови.

Инаку, според статистичките податоци може да се забележи дека само две држави членки на ЕУ регистрирале раст на бројот на комерцијални летови во август 2022, споредено со предпандемискиот август од 2019 година. Тоа се Грција, со зголемување на бројот на летови за 5 проценти и Луксембург, каде растот е 2 отсто.

Сосема спротивна е состојбата во Словенија, Латвија и Финска, државите со најголем пад на бројот на патнички летови. Во Словенија се речиси преполовени, односно намалувањето изнесува дури 42 отсто споредено со август 2019 година. Во Латвија летовите се намалиле за 39 проценти, а во Финска за 31 отсто.

 

 

Статистиката покажува дека дел од аеродромите во ЕУ забележале раст на бројот на остварени летови од комерцијален тип споредено за периодот август 2022 со август 2019 година. Најголем раст регистрираше аеродромот во Наполи, Каподикино, со 1.156 летови повеќе, или пораст од 14 отсто, следува кипарскиот аеродром Керкира Јоанис Кападистриас со реализирани 1.026 летови повеќе, што е зголемување од 22 проценти и грчки Санторини, со зголемување од 978 летови, или раст од 30 отсто.

На долниот дел од табелата се сместени Франкфурт Мајн со најголем пад на остварени комерцијални летови во август годинава, споредено со истиот месец од предпандемиската 2019 година. На овој аеродром имало дури 10.554 летови помалку, што претставува пад од 23 отсто. На опашката се сместени два италијански аеродроми, Милано Малпенза со 9.048 летови помалку, или минус од 34 проценти и Рома Фјумичино со негатива од 8.018 летови, што претставува пад од 27 отсто.

Во моментов нема коментари за веста. Биди прв да коментира...

Остави коментар