ЕЦБ ги остави каматните стапки непроменети

Европската централна банка ги остави каматните стапки непроменети по четврти пат, додека инфлацијата се движи околу целната вредност, а еврозоната се справува со глобалните шокови.

Депозитната стапка беше задржана на 2 отсто по денешниот состанок - како што предвидоа сите аналитичари во анкетата на „Блумберг“. Креаторите на политиките продолжија да не даваат насоки за идните чекори, нагласувајќи дека ќе одлучуваат состанок по состанок врз основа на новите податоци.

Новите прогнози одат во правец на посилен економски раст и инфлација која ќе се врати на 2 отсто во 2028 година, откако ќе остане под тој праг во наредните две години.

Bloomberg

Ажурираната проценка „потврдува дека инфлацијата треба да се стабилизира на целта од 2 отсто на среден рок,“ соопшти ЕЦБ.

Еврото ја избриша претходната загуба и се тргуваше околу 1,1733 долари. Германските обврзници благо паднаа, со принос на 10-годишните обврзници повисок за еден базичен поен на 2,87 отсто.

Повеќето официјални лица на ЕЦБ веќе сигнализираа дека пониската инфлација не бара итна акција, а аналитичарите во посебна анкета сугерираат дека трошоците за задолжување може да останат на сегашното ниво до 2027 година.

Тоа не е случај насекаде: Банката на Англија ги намали стапките порано истиот ден, по сличниот потег минатата недела на Федералните резерви. Двете институции можат дополнително да олеснат следната година.

Инвеститорите, сепак, ја намалуваат веројатноста за понатамошно глобално олеснување и почнуваат да се обложуваат на прво зголемување од ЕЦБ уште во 2026 година.

Во заднината на последниот состанок стои економија која изгледа поцврста отколку во претходните месеци, задржувајќи раст и во најтешките моменти од трговските конфликти и дури надминувајќи ги очекувањата во третиот квартал.

Бизнис-анкетите објавени од S&P Global сигнализираат стабилна динамика во последните месеци од годината, со фискална стимулација во Германија која треба да го поддржи натамошниот раст.

Според претседателката на ЕЦБ, Кристин Лагард, домашната побарувачка ќе биде главниот мотор на растот во наредните години.

„Бизнис инвестициите и значителната владина потрошувачка за инфраструктура и одбрана сè повеќе треба да ја поддржуваат економијата,“ изјави таа во Франкфурт.

„Сепак, предизвикувачката средина за глобалната трговија веројатно ќе остане пречка.“

За инфлацијата, официјалните лица сигнализираа дека се подготвени да прифатат цените да растат под целната стапка извесно време. Членката на Извршниот одбор, Изабел Шнабел, рече дека не би била премногу загрижена сè додека таквите отстапувања се мали.

„Инфлацијата треба да опадне на краток рок - главно затоа што претходните зголемувања на цените на енергијата ќе исчезнат од годишните стапки,“ рече Лагард. „Потоа треба да се врати на целта во 2028 година, со силен раст на енергетската инфлација.“

Bloomberg

Со намалени ценовни ризици и изненадувачки робусна економија, гувернерот на централната банка на Литванија, Гедиминас Симкус - кој претходно се бореше да ја задржи можноста за уште едно намалување — изјави дека повеќе не гледа потреба за понатамошно олеснување.

Долгата пауза на стапките би го завршила циклусот на олеснување со осум намалувања. Тоа би било добредојдено од Шнабел, која смета дека следниот потег- кога и да дојде- најверојатно ќе биде зголемување.