.webp){kind=icon}
Макроекономските проекции на буџетот за следната година се реални, но најголемата неизвесност доаѓа од развојот на настаните во Украина, кои и натаму влијаат врз понудата и достапноста на електричната енергија, енергентите, како и понудата, цените и достапноста на храна. Вака Никица Мојсоска-Блажевски, главна извршна директорка на „Македонија 2025“, го коментира буџетот што Владата веќе го усвои и претстави. Сепак, во разговор за Блумберг Адрија ТВ, таа вели дека има низа нејаснотии во тоа на кој начин е скроена државната каса.
„Во врска со даночната реформа, мислам дека Владата мора да излезе со јасен концепт, јасен сигнал и кон бизнисите и кон граѓаните за тоа што би опфаќала таа даночна реформа, дали ќе има враќање на прогресивниот данок итн. Живееме во време на голема неизвесност, а ова е дополнителна неизвесност и за бизнисите и за граѓаните и ги обременува“, коментира Мојсоска-Блажевски.
Директорката на „Македонија 2025“ коментира и за проширувањето на даночната база, како легитимна цел што значи намалување на неформалната економија.
„Тоа е нешто на што треба да работиме, меѓутоа не сум сигурна дека може да бидеме доволно амбициозни и да предвидиме голем раст на приходите за една година врз оваа основа“, вели Никица Мојсоска-Блажевски.
Според неа, оптимизација на јавната администрација е нешто неопходно, кое ќе помогне за намалување на расходите.
„Не може постојано да отвораме нови институции и да се зголемува јавната администрација, притоа продуктивноста и услугите што ги даваат кон граѓаните и бизнисите да се понеквалитетни“, вели Мојсоска-Блажевски во гостувањето во Блумберг Адрија ТВ.
Капиталните инвестиции ги смета за малку оптимистички предвидени и не е сигурна дека сето тоа може да се реализира. Таа вели дека не може да очекуваме ниту дека следната година ќе има поволни услови за задолжување, за да се покријат тековните долгови и дефицитот.
„Мој апел е малку повеќе да се размислува за иднината и за тоа што ќе им остане на следните генерации како долг“, вели Никица Мојсоска-Блажевски, главна извршна директорка на „Македонија 2025“.
Целиот разговор за Блумберг Адрија ТВ погледнете го во видеото.
