Нов рекорд: Инфлацијата се доближи до 20 отсто

Инфлацијата во земјава се доближи до 20 отсто. Во октомври, според податоците на Државниот завод за статистика, трошоците на живот се зголемиле за 19,8 отсто споредено со истиот месец лани. Во однос на септември, пак, зголемувањето изнесува 1,4 отсто.

Најголемо влијание на растот на инфлацијата има храната. За една година, таа поскапела за 31,2 отсто. На месечно ниво, храната е поскапа за 2,8 отсто. Минимален раст бележат и цените на транспортот и на домувањето во октомври споредено со септември.

Во октомври пораснаа цените на основните прехранбени производи. И натаму растот е најбрз кај лебот и житото. Во однос на лани, цените се за близу 48 отсто повисоки.

Во однос на минатиот месец забави растот на цените на млекото, но тоа и натаму е за над 40 отсто поскапо од лани.

Месото исто така и натаму поскапува. За една година цената е повисока за над 28 отсто.

Трендот на намалување на цената продолжува само кај маслото за јадење. Надолниот тренд што почна летото, продолжи во октомври.

Власта очекува дека почнувајќи од декември цените на храната ќе се намалат за околу десет отсто. Оттогаш компаниите производители на храна ќе плаќаат поевтина струја како дел од мерките на Владата за помош на стопанството. Цената за нив ќе биде 80 евра за мегават-час.

Од почетокот на оваа година до октомври, инфлацијата изнесува 13,2 отсто. За идната година е планирана инфлација од 7,1 отсто, што и натаму е над целните два отсто годишна инфлација.

Во моментов нема коментари за веста. Биди прв да коментира...

Остави коментар