.webp){kind=icon}
Народната банка останува претпазлива во водењето на политиките. Инфлацијата забавува, но и натаму е над историскиот просек, а има и ризици. Меѓу ризиците се цените на храната, кои од 1 март веќе не се замрзнати. Власта вели дека ја има состојбата под контрола и дека новиот закон ќе го спречи растот на цените, а со тоа и инфлацијата.
Главно поради овој ризик НБРМ и овој пат ја остави каматната стапка на нивото од 6,30 отсто односно постапи исто како Европската централна банка (ЕЦБ) претходно, донесе одлука да чека.
Функционерите на ЕЦБ, пак, постигнаа начелна согласност за намалување на каматите напролет, со напомена дека пролетта, календарски, трае до 21 јуни. Во САД, пак, податоците за инфлацијата во февруари не се поволни и одат во прилог на тоа дека и Фед ќе треба да чека.
Од друга страна, цените на храната не мируваат. Какаото на светските берзи уште минатиот месец ги урна рекордите стари половина век. Заврши времето и на евтините банани и портокали. Неизвесноста за цените на храната расте како што се намалува земјоделското земјиште во корист на производството на енергенти. Научниците се пред тежок избор – како да се направи рамнотежа во производството на енергенти и храна, двата клучни фактори за раст на инфлацијата.
А борбата со растечките цени придонесе за намалување на економската активност. Затоа, првпат по подолго време, крајот на минатата година донесе раст на невработеноста во земјава. Бројот на лица што бараат работа расте во услови кога потребата за работна сила е на највисоко ниво. Работодавците бараат зголемување на квотите за увоз на работници, додека домашните ги подготвуваат документите за заминување. Само лани над 13.000 Македонци легално работеле во Хрватска.
Во светот е официјално дека поранешниот претседател на САД Доналд Трамп и сегашниот претседател Џо Бајден ќе имаат уште еден изборен дуел во ноември. Според „Асошиејтед прес“, тоа ќе биде реванш меѓу двајца погрешни и непопуларни претседатели, нешто што многу гласачи не го сакаа. Едниот од нив, Трамп, го откри и човековиот непријател – Фејсбук. Деновиве со него се согласува и идната англиска кралица, принцезата од Велс, по лавината што ја предизвика на социјалните мрежи со признанието дека ја дотерувала сликата со нејзините деца што ја објави по повод Денот на мајката.
Ѕвезда на неделата е биткоинот. Сега кога е јасно дека криптозимата премина во криптотреска, единственото прашање е дали неговата вредност ќе стигне до 100.000 долари.
