.webp){kind=icon}
Лепенките „гарантирана цена“ на основните прехранбени производи од денеска ги нема. Владата реши да не ја продолжува мерката за замрзнување на цените, која важеше од лани во септември. За да не се случи раст на цените, власта најави дека од денеска ќе има строги контроли во маркетите, а наскоро ќе биде донесен и законот што ќе им стави крај на нелојалната конкуренција и нефер трговските практики. Сето ова е со цел бројките за инфлацијата во земјава да го задржат надолниот тренд.
Францускиот министер за финансии, пак, смета дека битката со инфлацијата е добиена по објавувањето на февруарските податоци за неговата земја. Денеска „Евростат“ ќе ги објави податоците за февруарската инфлација во еврозоната, а аналитичарите предвидуваат намалување на 2,5 отсто од 2,8 отсто.
Ова го зголемува оптимизмот дека следните чекори на ЕЦБ ќе одат во правец на намалување на каматните стапки, кои го направија задолжувањето најскапо во последните повеќе од 15 години. Растот на каматите не го намали интересот за кредити кај македонските компании.
Токму монетарните мерки и ниските цени на гасот се причина за намалување на добивката на „Макпетрол“. Компанијата објави пад од 40 отсто во однос на 2022 година. Од друга страна, финансиските извештаи покажуваат дека има компании што лани уривале рекорди.
Рекордно било и производството на струја од сонце. Во две години се инсталирани капацитети што можат да го заменат производството во РЕК Битола, ама на еколошки начин. Ваквиот пресврт донесе промени и во размената со Кина. Пазарот е преплавен со кинески соларни панели и литиумјонски батерии.
Македонскиот пазар е преплавен и со стари дизел-возила. Анализата покажува дека Македонците не се откажуваат од дизелот, додека регионот ги зголемува субвенциите за купување електрични возила.
Сериозен предизвик за земјава е и недостигот од наставници по природни науки. УНИЦЕФ предлага решение со кое ќе се намали бројот на училишта во селата, но за тоа ќе треба политичка одлука.
За разлика од Природно-математичкиот факултет во Скопје, каде што студенти нема, на ФИНКИ квотите растат од година на година, како сите млади да сакаат да станат програмери, а првиот човек на „Енвидија“ вели дека програмирањето веќе не треба да се учи затоа што со помош на вештачката интелигенција, во иднина, сите ќе бидеме програмери.
