.webp){kind=icon}
Намалувањето на каматните стапки во еврозоната е извесно, а подготвеност за преземање на чекорот најави и претседателката на Европската централна банка, Кристин Лагард. Челниците на банката го посочуваат состанокот во јуни како време кога ќе почне олабавувањето ако геополитичките притисоци дотогаш не се влошат.
Во земјава инфлацијата во март забрза, цените на храната се зголемија, па НБРМ и на седницата одржана неделава ја остави каматната стапка на ниво од 6,30 отсто. Следниот состанок на Комитетот е на 11 јуни и, според досегашните прогнози, по него каматите најверојатно ќе паднат. Има и други сигнали дека доаѓаат подобри времиња.
Сигналите во САД се поинакви. Првиот човек на Фед најавува можност за одложување на очекуваното олабавување на монетарните политики, а ПИМКО предупредува дека поради повисоката инфлација, каматите може и да се зголемат.
Цените на енергентите реагираат веднаш по нападот на Иран врз Израел. Гасот за Европа се продава по повисоки цени, првично поскапе и нафтата, но по објавата на САД дека резервите се на десетмесечен максимум, значително поевтини. Во исто време нафтените резерви во Македонија се под законскиот минимум.
Кина, земјата што досега даваше најмала поддршка за климатските активности, објави дека планира да ги принуди најголемите загадувачи да ги намалат емисиите. И нашите аналитичари неделава посветија поголемо внимание на намалувањето на штетните емисии и цената што земјите во регионот ќе треба да ја платат за да го постигнат тоа.
Неделава го анализиравме и осигурителниот пазар. Сегментот осигурување живот забрзано расте, во него од почетокот на годинава се вложени над пет милиони евра. Пишувавме и за главните предизвици во финансискиот лизинг, кој исто така бележи раст во последниот период.
Регионот влегува во изборниот циклус. Во Хрватска, по парламентарните избори во средата, почнува битката за формирање влада, а во земјава, пред првото гласање закажано за среда, на претседателската кампања од вчера е додадена и таа за парламентарните избори.
Со рубриката Престиж неделава ве одведовме на ноќевање на карпа во Демиркаписката Клисура и на отворањето на првиот ексклузивен салон на „Масерати“ во регионот, а ви го претставивме и „Барби“ сосот за скара.
