Истите шокови со кои се соочува светот се манифестираат различно во секоја земја поради структурните карактеристики. На пример, во Македонија за производство на единица бруто-домашен производ (БДП) се троши трипати повеќе струја отколку во Европската Унија (ЕУ), вели гувернерката Анита Ангеловска-Бежоска во изјава за Блумберг Адрија ТВ.
„Ако се споредиме со Европската Унија (ЕУ), нашиот инфлациски диференцијал се зголеми. Причини за тоа има повеќе. Во голема мера тоа се структурните разлики, домашните фактори што постојат во одделните економии. На пример, кај нас, нашата трговска отвореност односно зависност од увоз е многу поголема од ЕУ. Кај нас вкупната трговска отвореност е 140 проценти од БДП, а во ЕУ е околу 70 отсто, што значи дека ние имаме помалку домашни ресурси за да ги ублажиме надворешните шокови со кои се соочуваме. Понатаму, многу е важна и зависноста во сегментот на енергијата и енергетската интензивност. Ние за да произведеме една единица БДП, трошиме во просек трипати повеќе енергија од тоа што троши ЕУ. Тоа значи дека истиот ценовен шок повеќе нè погодува“, вели гувернерката на НБРМ.
Ангеловска-Бежоска упатува и на разликите во потрошувачката кошничка, поради што кај нас последиците се многу повидливи и почувствителни за разлика од Европа.
„Исто така, ако се погледне потрошувачката кошничка, има голема разлика. Кај нас храната и енергијата во потрошувачката кошничка на инфлацијата учествуваат со околу 55 проценти, а во ЕУ се нешто над 30 проценти. Повторно, истиот шок се манифестира со многу поголем интензитет во различните економии, имајќи ги предвид структурните карактеристики“, вели гувернерката.
Погледнете го видеото со целата изјава од гувернерката на НБРМ за Блумберг Адрија ТВ.
.webp){kind=icon}
